24 сакавіка, Ліда /Кар. БЕЛТА/. Людзі павінны самі шукаць работу, але дзяржаве неабходна дапамагчы ім. Аб гэтым Прэзідэнт Беларусі Аляксандр Лукашэнка заявіў сёння ў час рабочай паездкі ў Гродзенскую вобласць, перадае карэспандэнт БЕЛТА.
Кіраўнік дзяржавы канкрэтызаваў сваё даручэнне разабрацца да мая з працаўладкаваннем беспрацоўных грамадзян. "Калі я гаварыў, што да 1 мая трэба, каб усе працавалі, я меў на ўвазе, што вы павінны ім прапанаваць работу", - растлумачыў ён. Напрыклад, цяпер настаў час вясенніх палявых работ, значыць, можна сфарміраваць брыгады, якія працавалі б у сельгаспрадпрыемствах. Пры гэтым трэба стварыць усе неабходныя ўмовы для правільнай арганізацыі працы.
Разам з тым, падкрэсліў Прэзідэнт, неабходна прадоўжыць стварэнне новых рабочых месц на дзеючых і ўводзімых у строй прадпрыемствах, пры неабходнасці навучаць людзей новым спецыяльнасцям. "Чалавек не павінен паасобку шукаць гэту работу, хоць, вядома, гэта яго справа. Але існуючая сітуацыя, калі мы таксама недапрацоўвалі ў плане занятасці людзей, насцярожвае, і з гэтага трэба рабіць вывады. Таму я і сказаў, што да 1 мая ў асноўным трэба людзей задзейнічаць, - адзначыў Аляксандр Лукашэнка. - Мы павінны дапамагчы людзям знайсці работу. Таму вось так трэба разумець: прапанаваць чалавеку працаваць, задзейнічаць яго ўсюды".
Кіраўнік дзяржавы растлумачыў і патрабаванне не звальняць людзей без узгаднення з мясцовымі органамі ўлады: "Нельга выкідваць людзей дзеля павелічэння заработнай платы. Куды гэты чалавек пойдзе? Трэба ж вызначыцца". Гэта значыць, калі на прадпрыемстве скарачаюць некалькі чалавек, кіраўнікі вытворчасці разам з органамі ўлады павінны вырашыць, куды іх працаўладкаваць.
Аляксандр Лукашэнка таксама пацікавіўся ўзроўнем заработнай платы ў Гродзенскай вобласці і яшчэ раз нагадаў аб сваім даручэнні выйсці на сярэдні ўзровень аплаты працы па краіне ў эквіваленце $500. "Калі Гродна не атрымае, што тады з Магілёва патрабаваць? Нам трэба людзям даць гэту зарплату, каб яна па краіне была сярэдняя. Гэта жалезабетонна трэба зрабіць", - заявіў ён.-0-
