27 мая, Пінск /Уладзімір Мацвееў - БЕЛТА/. Беларусь прадоўжыць дыверсіфікаваць экспартныя рынкі. Аб гэтым паведаміў Прэзідэнт Беларусі Аляксандр Лукашэнка сёння ў час размовы з прадстаўнікамі працоўнага калектыву ЗАТ "Амкадор-Пінск", перадае карэспандэнт БЕЛТА.
"Трэба ісці на новыя рынкі, асвойваць Азію, Афрыку, Лацінскую Амерыку, Еўрасаюз, ЗША, не страчваючы, вядома, асноўны расійскі рынак", - заявіў Прэзідэнт.
Кіраўнік дзяржавы адзначыў, што нядаўні абвал на расійскім і ўкраінскім рынках у плане попыту і аб'ёмаў продажаў прадукцыі негатыўна паўплываў на беларускую эканоміку. "Гэта таму, што мы не паспелі дыверсіфікаваць экспарт. Хоць гадоў 15 таму больш за 80 працэнтаў прадукцыі мы прадавалі ў Расію. Сёння - менш за 50 працэнтаў. Гэта значыць, вялікі шлях пройдзены. Але расійскі рынак пакуль яшчэ вельмі ўплывае на нас. Калі там абвал, то мы гэта адразу адчуваем", - адзначыў беларускі лідар.
"Таму мы дыверсіфікуем рынкі, але не страчваем расійскі. Ён побач. Тым больш, тэхніка, якую мы вырабляем, знаходзіць попыт у Расіі", - дадаў Аляксандр Лукашэнка.-0-
