30 чэрвеня, Мінск /Кар. БЕЛТА/. Намеснік міністра замежных спраў Беларусі Алена Купчына правяла 29 чэрвеня сустрэчы з венгерскімі парламентарыямі ў час візіту ў Венгрыю, паведамілі БЕЛТА ў прэс-службе МЗС Беларусі.
Алена Купчына сустрэлася з намеснікам старшыні Дзяржаўнага сходу Венгрыі, старшынёй групы дружбы Беларусь - Венгрыя Шандарам Лежакам. "Бакі абмеркавалі пытанні пашырэння супрацоўніцтва паміж парламентамі дзвюх краін, сумесныя праекты ў гуманітарнай і культурнай сферах у кантэксце запланаванага на 2017 год святкавання 25-годдзя ўстанаўлення дыпламатычных адносін паміж Беларуссю і Венгрыяй", - растлумачылі ў знешнепалітычным ведамстве.
Адбылася і сустрэча са старшынёй камісіі па міжнародных справах Дзяржаўнага сходу Венгрыі Жолтам Неметам. Тэмай сустрэчы стала пашырэнне беларуска-венгерскіх міжпарламенцкіх кантактаў на шматбаковых пляцоўках, у тым ліку парламенцкага вымярэння Цэнтральна-Еўрапейскай ініцыятывы, дзе ў 2017 годзе Беларусь будзе старшынёй. "Асобная ўвага была ўдзелена перспектывам наладжвання канструктыўнага дыялогу з Парламенцкай асамблеяй Савета Еўропы і Еўрапарламентам. Бакі абмеркавалі вынікі візіту венгерскай парламенцкай дэлегацыі на чале з Жолтам Неметам у Беларусь, які прайшоў у канцы красавіка 2016 года", - дадалі ў МЗС.
Намеснік міністра замежных страў таксама азнаёміла венгерскіх парламентарыяў з тым, як ідзе падрыхтоўка да выбараў у Нацыянальны сход Рэспублікі Беларусь.-0-
