18 студзеня, Мінск /Кар. БЕЛТА/. Спецыяльны прадстаўнік Парламенцкай асамблеі АБСЕ па Усходняй Еўропе Кент Харстэд наведае з візітам Беларусь 21-24 студзеня. Аб гэтым паведаміў сёння журналістам начальнік упраўлення інфармацыі і лічбавай дыпламатыі - прэс-сакратар МЗС Беларусі Дзмітрый Мірончык, перадае карэспандэнт БЕЛТА.
"Гэта яго першы візіт у нашу краіну ў якасці спецпрадстаўніка. У час сустрэч акцэнт будзе зроблены на абмеркаванні рэкамендацый БДІПЧ АБСЕ па пытаннях удасканалення выбарчага працэсу ў Беларусі", - адзначыў Дзмітрый Мірончык.
Запланаваны сустрэчы Кента Харстэда з міністрам замежных спраў Беларусі Уладзімірам Макеем, старшынёй ЦВК Лідзіяй Ярмошынай, кіраўніцтвам беларускага парламента.
Праграма візіту таксама прадугледжвае наведванне спецпрадстаўніком ПА АБСЕ Беларускай гандлёва-прамысловай палаты, Парка высокіх тэхналогій і Кітайска-беларускага індустрыяльнага парка "Вялікі камень".-0-