21 снежня, Мінск /Кар. БЕЛТА/. Трохбаковая кантактная група (ТКГ) па ўрэгуляванні сітуацыі на ўсходзе Украіны дамовілася адносна бестэрміновага спынення агню ў зоне канфлікту з 00.00 23 снежня, паведаміў 20 снежня журналістам спецпрадстаўнік АБСЕ ў ТКГ Марцін Сайдзік, перадае карэспандэнт БЕЛТА.
Па выніках пасяджэння ў Мінску Марцін Сайдзік зачытаў заяву, у якой гаворыцца, што ТКГ пры ўдзеле прадстаўнікоў асобных раёнаў Данецкай і Луганскай абласцей (АРДВ і АРЛВ) падкрэслівае неабходнасць забеспячэння міру і спакою ў сувязі з надыходзячымі каляднымі і навагоднімі святамі. Акрамя таго, кіруючыся раней дасягнутымі дамоўленасцямі і абавязацельствамі бакоў, удзельнікі перагавораў пацвярджаюць прыхільнасць да захавання ўсёабдымнага, устойлівага і бестэрміновага рэжыму спынення агню з 00.00 гадзін 23 снежня па кіеўскім часе. Пры гэтым павінны быць выдадзены і выкананы адпаведныя загады, уключаючы дысцыплінарныя меры за парушэнне рэжыму спынення агню.
Таксама ідзе размова аб імкненні правесці абмен утрымліваемымі да навагодніх і калядных свят у адпаведнасці з раней дасягнутымі дамоўленасцямі.
Што ж датычыцца мінскіх пагадненняў, удзельнікі кантактнай групы выказалі агульную прыхільнасць да іх поўнага выканання.-0-
