12 снежня, Мінск /Кар. БЕЛТА/. У Берне адбылося ўстаноўчае пасяджэнне дэпутатаў Федэральнага сходу Швейцарскай Канфедэрацыі, у ходзе якога была створана нефармальная парламенцкая група дружбы Швейцарыя-Беларусь, паведамляе БЕЛТА са спасылкай на сайт пасольства Беларусі ў Швейцарыі.
"Гэта першая швейцарская парламенцкая група дружбы з Беларуссю за 25 гадоў беларуска-швейцарскіх дыпламатычных адносін", - гаворыцца ў паведамленні.
У склад групы ўвайшлі прадстаўнікі верхняй і ніжняй палат парламента Швейцарыі. Сустаршынямі групы сталі кіраўнік камітэта па знешняй палітыцы Савета кантонаў Філіпа Ламбардзі, кіраўнік камітэта па фінансах Нацыянальнага савета Маргарэт Кінер Нелен, а таксама дэпутат Нацыянальнага савета Андрэас Эбі.
"Група адкрыта для далучэння іншых дэпутатаў Федэральнага сходу Швейцарыі", - адзначаецца ў паведамленні.-0-
