16 кастрычніка, Мінск /Кар. БЕЛТА/. Спецпрадстаўнік АБСЕ ў трохбаковай кантактнай групе па ўрэгуляванні сітуацыі на ўсходзе Украіны Марцін Сайдзік па выніках пасяджэння ТКГ у Мінску заклікаў бакі канфлікту ва Украіне прытрымлівацца рэжыму спынення агню, перадае карэспандэнт БЕЛТА.
"Як вядома, у пачатку кастрычніка ва Украіне было прадоўжана дзеянне закона аб асаблівым статусе асобных раёнаў Данецкай і Луганскай абласцей. Са свайго боку я вітаю гэты факт, як сведчанне прыхільнасці Украіны да мінскіх пагадненняў і мірнага вырашэння канфлікту", - сказаў Марцін Сайдзік.
Ён адзначыў, што ў той жа час узрасла колькасць парушэнняў рэжыму спынення агню, і гэта непазбежна прыводзіць да новых ахвяр сярод грамадзянскага насельніцтва - на мінулым тыдні загінулі маці і дачка. "У сувязі з гэтым я яшчэ раз настойліва заклікаю ўсе бакі не дапускаць такога і праявіць строгую стрыманасць", - падкрэсліў спецпрадстаўнік.
Гэта пытанне стала сёння ключавым у рабочай групе па бяспецы. Абмяркоўваліся дадатковыя меры па забеспячэнні доўгатэрміновага рэжыму спынення агню, пытанні развядзення сіл і сродкаў, а таксама практычнае ажыццяўленне гуманітарнага размініравання.
Гуманітарная рабочая група прадоўжыла дыскусію па пытаннях, звязаных з абменам тых, каго ўтрымліваюць, і пошукам прапаўшых без вестак. Таксама абмяркоўваліся магчымасці паляпшэння ўмоў перасячэння лініі сутыкнення праз пункты пропуску.
У цэнтры ўвагі эканамічнай рабочай групы было водазабеспячэнне ў сістэмах "Карбаніт" і "Вада Данбаса", уключаючы далейшыя крокі па рамонце Паўднёваданбаскага вадавода і работ у прамысловай зоне Аўдзееўкі. Палітычная ж падгрупа працягвала сваю работу па імплементацыі формулы Штайнмаера.
Адказваючы на пытанне аб кіраўніку ўкраінскай дэлегацыі, спецпрадстаўнік сказаў, што такую тэму сёння не закраналі. "Мы не абмяркоўвалі такое пытанне, таму што гэта чыста ўкраінская кампетэнцыя. І я ўпэўнены, што Украіна своечасова наконт гэтага паведаміць", - адзначыў Марцін Сайдзік. Раней кіраўнік украінскай дэлегацыі былы прэзідэнт Украіны Леанід Кучма пакінуў гэту пасаду.
Спецпрадстаўнік звярнуў увагу, што сёння першы намеснік кіраўніка СММ АБСЕ ва Украіне Аляксандр Хуг апошні раз удзельнічаў у пасяджэнні кантактнай групы. Ён пакідае сваю пасаду. Марцін Сайдзік ад імя ўсіх удзельнікаў ТКГ падзякаваў Аляксандру Хугу.
Наступнае пасяджэнне трохбаковай кантактнай групы па ўрэгуляванні сітуацыі на ўсходзе Украіны адбудзецца ў Мінску 6 лістапада.-0-
