29 чэрвеня, Мінск /Кар. БЕЛТА/. Удзельнікі рабочай групы па аспектах бяспекі ва ўрэгуляванні канфлікту ва Украіне дамовіліся аб развядзенні сіл у двух раёнах, паведаміў сёння журналістам спецпрадстаўнік АБСЕ ў трохбаковай кантактнай групе па Украіне Марцін Сайдзік, перадае карэспандэнт БЕЛТА.
"Удзельнікі рабочай групы па бяспецы прадоўжылі разгляд пытанняў, якія ўжо абмяркоўваліся ў рамках канферэнцыі гэтай рабочай групы 24 чэрвеня, - растлумачыў Марцін Сайдзік. - Сёння ў гэтых пытаннях быў дасягнуты істотны прагрэс. З задавальненнем хачу адзначыць, што ўсе бакі, у прынцыпе, дасягнулі пагаднення аб развядзенні сіл і сродкаў у двух месцах: Залатое і Пятроўскае. Работа па гэтым пытанні будзе прадоўжана".
Рабочая група па эканамічных пытаннях у асноўным абмяркоўвала тэму аднаўлення чыгуначнай інфраструктуры. Таксама ішла размова аб сацыяльных плацяжах і аб пытаннях уласнасці. "Дыскусія прадэманстравала неабходнасць тэрміновага вырашэння сацыяльных праблем у зоне канфлікту. У прыватнасці, гэта запазычанасць па заработнай плаце перад работнікамі ў асобных раёнах Данецкай і Луганскай абласцей", - зрабіў акцэнт спецпрадстаўнік АБСЕ.
Пры гэтым сёння ў час перагавораў было паведамлена, што пастаўку вугалю з асобных раёнаў Данецкай вобласці на тэрыторыю, падкантрольную ўкраінскаму ўраду, часткова аднавілі. Марцін Сайдзік адзначыў, што гэты аспект вельмі важны для вытворчасці электраэнергіі і ў далейшым неабходна выпрацаваць больш зладжаны механізм перавозак вугалю.
Рабочая група па палітычных пытаннях дэталёва абмеркавала пытанні амністыі і правядзення мясцовых выбараў у асобных раёнах Данецкай і Луганскай абласцей.-0-
