16 лістапада, Мінск /Кар. БЕЛТА/. Пытанні захавання рэжыму спынення агню былі галоўнымі на перагаворах па канфлікце ва Украіне. Аб гэтым заявіў 15 лістапада журналістам спецпрадстаўнік АБСЕ ў трохбаковай кантактнай групе Марцін Сайдзік, перадае карэспандэнт БЕЛТА.
"У сувязі з падзеямі апошняга тыдня пытанні захавання рэжыму спынення агню і бяспекі грамадзянскага насельніцтва ў зоне канфлікту былі галоўнымі для трохбаковай кантактнай групы і яе рабочай групы па бяспецы, - сказаў Марцін Сайдзік. - У апошні час назіраўся рост колькасці парушэнняў рэжыму спынення агню. На мінулым тыдні ў параўнанні з папярэднім гэта колькасць узрасла на 14 працэнтаў, а ўчора ўсяго толькі за суткі колькасць парушэнняў дасягнула дзвюх тысяч, што з'яўляецца сумным рэкордам у другой палове гэтага года".
Трохбаковая кантактная група чарговы раз падкрэсліла, што ўсе парушэнні рэжыму спынення агню, асабліва паблізу аб'ектаў грамадзянскай інфраструктуры, уяўляюць сабой пагрозу для насельніцтва. Поўнасцю ўсведамляючы ўсе гэтыя рызыкі і пагрозы, бакі яшчэ раз пацвердзілі сваю прыхільнасць да поўнага і бестэрміновага рэжыму спынення агню, а таксама ўзгаднілі сумесную заяву. "Трохбаковая кантактная група пры ўдзеле прадстаўнікоў АРДВ і АРЛВ (асобныя раёны Данецкай і Луганскай абласцей) пацвярджае сваю поўную прыхільнасць перамір'ю, аб'яўленаму ў сувязі з пачаткам навучальнага года, і безумоўнаму выкананню дадатковых мерапрыемстваў, накіраваных на забеспячэнне ўсёабдымнага і ўстойлівага бестэрміновага спынення агню, уключаючы выкананне ўсіх адпаведных загадаў", - агучыў тэкст заявы Марцін Сайдзік.
Удзельнікі эканамічнай рабочай групы абмяркоўвалі пытанні водазабеспячэння, а менавіта бягучыя разлікі і пагашэнне запазычанасці за пастаўленую ваду. Абмяркоўваліся, у прыватнасці, пастаўкі вады ў сістэме "Карбаніт". "Спадзяюся, што ў хуткім часе бакі прыйдуць да рашэнняў, якія даюць магчымасць аднавіць поўнае функцыянаванне гэтай сістэмы", - адзначыў Марцін Сайдзік. Таксама рабочая група прадоўжыла разгляд магчымасцей пагашэння запазычанасці былым супрацоўнікам Украінскай чыгункі ў АРДВ і АРЛВ.
У час работы гуманітарнай рабочай групы пасол Тоні Фрыш праінфармаваў аб сваёй чарговай паездцы ў Луганскую вобласць, дзе наведваў цэнтры ўтрымання па абодва бакі ад лініі сутыкнення, а таксама пункты пропуску "Залатое" і "Станіца Луганская". Група прадоўжыла дыскусію па магчымым абмене ўтрымліваемых у сувязі з канфліктам асоб. Марцін Сайдзік пераканаўча заклікаў бакі прадэманстраваць гуманнасць і зрабіць усё магчымае для вызвалення ўтрымліваемых да навагодніх і калядных свят.
Палітычная рабочая група прадоўжыла абмеркаванне пытанняў, звязаных з мадальнасцямі імплементацыі так званай формулы Штайнмаера ў кантэксце прадаўжэння дзеяння закона аб асаблівым статусе АРДВ і АРЛВ і перагавораў у "нармандскім фармаце".-0-
