20 снежня, Мінск /Кар. БЕЛТА/. Праект прыярытэтаў партнёрства паміж Беларуссю і Еўрасаюзам на 2017-2020 гады абмеркаваны на чацвёртым пасяджэнні Каардынацыйнай групы Беларусь - ЕС у Бруселі 19-20 снежня. Аб гэтым БЕЛТА паведамілі ў пасольстве.
"На мерапрыемстве разгледжаны перспектывы далейшага развіцця адносін Беларусі з Еўрасаюзам, уключаючы ўдзел Беларусі ў ініцыятыве ЕС "Усходняе партнёрства", узаемадзеянне ў сферы мабільнасці, бягучы стан галіновых дыялогаў, супрацоўніцтва ў рамках тэхнічнай дапамогі ЕС, а таксама тэматыка правоў чалавека. Асаблівая ўвага ўдзелена асноўным задачам і напрамкам супрацоўніцтва ў рамках "Усходняга партнёрства" да 2020 года", - расказалі ў пасольстве.
Бакі абмеркавалі стан і перспектывы рэалізацыі праграм тэхнічнай дапамогі Еўрасаюза ў Беларусі, уключаючы выкарыстанне існуючых і перспектыўных інструментаў ЕС, удзел Беларусі ў праграме партнёрства ЕС для Усходняй Еўропы па энергаэфектыўнасці і ахове прыроды. Разгледжаны магчымасці актывізацыі праектнага ўзаемадзеяння ў сферах транспарту і лагістыкі, рэгіянальнага развіцця, падтрымкі прадпрымальніцтва і іншых, у тым ліку з прыцягненнем міжнародных фінансавых інстытутаў.
Былі праведзены двухбаковыя экспертныя кансультацыі па праекце пагаднення аб спрашчэнні візавага рэжыму, абмеркаваны далейшы алгарытм сумесных крокаў па гэтым трэку.
Дэлегацыю Беларусі на пасяджэнні ўзначальваў намеснік міністра замежных спраў Алег Краўчанка, Еўрасаюза - кіруючы дырэктар па справах Еўропы і Цэнтральнай Азіі Еўрапейскай службы знешніх дзеянняў (ЕСЗД) Томас Маер-Хартынг. Прадстаўнікі асобных беларускіх няўрадавых арганізацый прынялі ўдзел у шэрагу сегментаў Каардынацыйнай групы.
Напярэдадні адбыўся трэці раўнд гандлёвага дыялогу паміж Беларуссю і Еўрасаюзам з удзелам прадстаўнікоў МЗС і Мінсельгасхарча Беларусі, а таксама Гендырэктарата па гандлі Еўракамісіі. Дэлегацыі традыцыйна абмяняліся інфармацыяй аб выніках двухбаковага гандлю, які ў бягучым годзе дэманструе пазітыўную дынаміку. Адбылося прадметнае абмеркаванне ўзаемна прымяняльных ветэрынарна-санітарных і фітасанітарных мер адносна сельскагаспадарчых тавараў.
Каардынацыйная група Беларусь - ЕС створана ў 2016 годзе для структураванага комплекснага дыялогу па ўсім спектры двухбаковага ўзаемадзеяння. Яе папярэдняе пасяджэнне абылося 6-7 красавіка 2016 года ў Бруселі, 16-17 лістапада 2016 года і 3-4 красавіка 2017 года ў Мінску.-0-
