Сцяг Пятніца, 29 сакавіка 2024
Усе навіны
Усе навіны
Палітыка
22 верасня 2016, 14:24

Пасол Таджыкістана адзначае пазітыўнае і ўзаемавыгаднае развіццё адносін з Беларуссю

22 верасня, Мінск /Кар. БЕЛТА/. Надзвычайны і Паўнамоцны Пасол Таджыкістана ў Беларусі, пастаянны паўнамоцны прадстаўнік Таджыкістана пры статутных і іншых органах Садружнасці Казідаўлат Каімдодаў у час канферэнцыі да 20-годдзя ўстанаўлення дыпламатычных адносін паміж Таджыкістанам і Беларуссю адзначыў пазітыўнае і ўзаемавыгаднае развіццё двухбаковых адносін, перадае карэспандэнт БЕЛТА.

"Сёння нашы адносіны з Беларуссю грунтуюцца на палітычных, гандлёва-эканамічных, гуманітарных, культурных сувязях. Яны развіваюцца ў рэчышчы дружалюбнага ўзаемавыгаднага супрацоўніцтва. Мы лічым іх пазітыўнымі - як на двухбаковай, так і на шматбаковай аснове. Да гэтага часу назіраецца актыўны палітычны дыялог - у першую чаргу на вышэйшым узроўні", - заўважыў дыпламат.

Паводле яго слоў, створана добрая таджыкска-беларуская дагаворна-прававая база, яна складае больш за 60 дзеючых пагадненняў, якія даюць магчымасць паспяхова развіваць узаемадзеянне ў розных сферах. Акрамя таго, апошнія гады актывізаваўся міжпарламенцкі дыялог, створаны групы дружбы. Праведзена 10 пасяджэнняў сумеснай міжурадавай камісіі. "Улічваючы пэўную зацікаўленасць у рэалізацыі эканамічных праектаў, міжурадавая камісія прымае меры па арганізацыі супрацоўніцтва ў такіх прыярытэтных сферах, як пастаўка машынабудаўнічай прадукцыі на аснове новых лізінгавых схем, супрацоўніцтва ў аграпрамысловым комплексе, энергетыцы, стварэнне сумесных вытворчасцей і прадпрыемстваў на тэрыторыі абедзвюх дзяржаў", - канстатаваў Казідаўлат Каімдодаў.

Так, ужо ёсць вопыт па пастаўцы беларускай сельскагаспадарчай тэхнікі і абсталявання. У прыватнасці, супрацоўнічаюць Рэспубліканскае дзяржаўнае ўнітарнае прадпрыемства "Таджыкагралізінг" і ААТ "МТЗ" Беларусі, а таксама іншыя партнёры з дзвюх краін. У цэлым жа гандлёва-эканамічныя сувязі арыентаваны на арганізацыю прамых узаемазвязаных паставак сыравіны, прадукцыі і тавараў народнага спажывання, развіццё прамысловай кааперацыі і адносін паміж рэгіянальнымі суб'ектамі і суб'ектамі гаспадарання бакоў.

Між тым пасол адзначыў зніжэнне ўзаемнага тавараабароту, што, паводле яго слоў, выклікае некаторую заклапочанасць. Так, у 2015 годзе знешнегандлёвы абарот складаў амаль $33 млн, хоць максімальны за апошнія некалькі гадоў дасягаў амаль $76 млн.

Дыпламат таксама звярнуў увагу, што апошнім часам больш увагі ўдзяляецца падпісанню пагадненняў на ўзроўні рэгіёнаў, якія могуць хутчэй дамовіцца і вырашыць пытанні без пасрэднікаў. Падпісаны дакументы аб супрацоўніцтве паміж Сагдыйскай і Віцебскай абласцямі, Сагдыйскай і Мінскай абласцямі, Яванскім і Уздзенскім раёнамі, гарадамі Худжанд і Магілёў.

Ключавымі крыніцамі экспарту Таджыкістана ў Беларусь з'яўляюцца бавоўнавае валакно, фрукты сушаныя, сумесі арэхаў або сушаных пладоў, пража баваўняная. Аснову беларускага экспарту складаюць трактары, цукар, бытавая тэхніка (халадзільнікі), мэбля, грузавыя аўтамабілі, лекавыя сродкі, а таксама сыравіна для розных вытворчасцей.-0-

Падпісвайцеся на нас у
Twitter
Топ-навіны
Свежыя навіны Беларусі