28 ліпеня, Мінск /Кар. БЕЛТА/. Палітычныя кантакты Беларусі і Турцыі ідуць нага ў нагу з дзелавым узаемадзеяннем. Аб гэтым міністр замежных спраў Беларусі Уладзімір Макей заявіў сёння на 14-м пасяджэнні Беларуска-турэцкага дзелавога савета, перадае карэспандэнт БЕЛТА.
"На працягу ўсёй гісторыі адносін незалежнай Рэспублікі Беларусь з Турэцкай Рэспублікай нашы палітычныя, дыпламатычныя кантакты ідуць нага ў нагу з дзелавым узаемадзеяннем, дапаўняюць і дапамагаюць адзін аднаму", - сказаў Уладзімір Макей.
Ён падкрэсліў, што сёння ў палітычным дыялогу паміж Беларуссю і Турцыяй няма супярэчнасцей і праблемных пытанняў. "Падабенства сацыяльна-эканамічных прыярытэтаў, накіраваных на развіццё рэальнага сектара эканомікі, павышэнне дабрабыту грамадзян, умацаванне пазіцый у міжнародным падзеле працы, ствараюць добрую аснову для беларуска-турэцкага гандлёва-эканамічнага і інвестыцыйнага партнёрства", - адзначыў міністр.
За апошнія дзесяць гадоў узаемны тавараабарот паміж дзвюма краінамі павялічыўся больш як у пяць разоў і перавысіў па выніках 2016 года $800 млн. "Безумоўна, гэта добры тэмп. Але гэта не мяжа. У нас існуюць сур'ёзныя перспектывы і значны патэнцыял для далейшага росту. Спадзяёмся, што па выніках бягучага года нам удасца выйсці на паказчык тавараабароту $1 млрд", - заявіў беларускі дыпламат.-0-