25 мая, Мінск /Кар. БЕЛТА/. Намеснік генеральнага сакратара Цэнтральнаеўрапейскай ініцыятывы Эрык Чарновіц і дэлегацыі 12 краін прымуць удзел у пасяджэнні Парламенцкага камітэта парламенцкага вымярэння ЦЕІ, якое пройдзе ў Мінску. Аб гэтым карэспандэнту БЕЛТА паведаміла старшыня Пастаяннай камісіі Савета Рэспублікі па адукацыі, навуцы, культуры і сацыяльным развіцці, кіраўнік дэлегацыі Нацыянальнага сходу Беларусі ў парламенцкім вымярэнні ЦЕІ Ірына Старавойтава.
Паводле слоў сенатара, Беларусь разглядае гэту арганізацыю як эфектыўны інструмент пашырэння і ўмацавання рэгіянальнага супрацоўніцтва. А гэта ў сваю чаргу азначае ўстанаўленне новых і пашырэнне дзеючых кантактаў з партнёрамі ў галіне эфектыўнай энергетыкі, устойлівага развіцця, экалогіі, навукі і тэхналогій, лагістыкі і іншых сферах.
"Адно са значных мерапрыемстваў у час старшынства Беларусі ў ЦЕІ ў 2017 годзе - пасяджэнне Парламенцкага камітэта парламенцкага вымярэння на тэму "Інтэлектуалізацыя эканомікі ў рэгіёне ЦЕІ: інавацыйная вытворчасць, кіраванне і чалавечы капітал", якое пройдзе 30 мая. Актыўную работу па яго падрыхтоўцы вядзе верхняя палата беларускага парламента", - расказала Ірына Старавойтава.
Плануецца, што ў мерапрыемстве будуць удзельнічаць члены Савета Рэспублікі, дэпутаты Палаты прадстаўнікоў, кіраўнікі шэрага міністэрстваў, намеснік генеральнага сакратара ЦЕІ Эрык Чарновіц, а таксама нацыянальныя дэлегацыі парламентаў 12 краін - Аўстрыі, Сербіі, Славеніі, Румыніі, Польшчы, Малдовы, Харватыі, Балгарыі, Славакіі, Венгрыі, Італіі, Украіны.
Плануецца абмеркаваць пытанні пашырэння выкарыстання інтэлектуальных інфармацыйных тэхналогій, садзейнічання пабудове лічбавай эканомікі, развіцця чалавечага капіталу. Ірына Старавойтава растлумачыла, што выбар тэмы пасяджэння абумоўлены тэндэнцыямі ў сучаснай эканоміцы. Гэта, напрыклад, інтэлектуалізацыя выкарыстоўваемых тэхналогій, рост навукаёмістасці тавараў, істотнае павышэнне значэння дзейнасці, звязанай з вытворчасцю, перадачай, захоўваннем і выкарыстаннем ведаў, жорсткая канкурэнцыя, якая прыводзіць да неабходнасці пастаяннага ўкаранення інавацый. "Па сутнасці, гэта глабальныя выклікі, вырашэнне якіх з'яўляецца важнай умовай захавання канкурэнтаздольнасці эканомік усяго свету", - заўважыла старшыня Пастаяннай камісіі.
"Пасяджэнне Парламенцкага камітэта дае магчымасць паказаць дасягненні нашай краіны ў галіне інавацыйнай вытворчасці, развіцця ІТ, чалавечага капіталу, навуковай і навукова-тэхнічнай дзейнасці", - упэўнена сенатар. На яе думку, гэта будзе садзейнічаць умацаванню эканамічнага, сацыяльнага, прававога і іншых аспектаў, а таксама фарміраванню станоўчага іміджу Беларусі ў сусветнай супольнасці. "З улікам гэтага ставіцца задача садзейнічаць пашырэнню ідэі "сумяшчальнасці ў Вялікай Еўропе", - расказала Ірына Старавойтава.
Вынікам стане прыняцце дакумента, у якім знойдуць адлюстраванне базавыя прынцыпы сумеснай работы ў сферы інтэлектуалізацыі эканомікі ў рэгіёне ЦЕІ.
Цэнтральнаеўрапейская ініцыятыва была створана ў 1989 годзе як арганізацыя, прызначаная садзейнічаць развіццю ўстойлівых сувязей паміж дзяржавамі Цэнтральнай, Заходняй і Усходняй Еўропы ў галіне палітыкі, эканомікі і культуры, а таксама для недапушчэння ўтварэння новых раздзяляльных ліній у Еўрапейскім рэгіёне. Сёння ў яе складзе 18 краін: Аўстрыя, Албанія, Беларусь, Балгарыя, Боснія і Герцагавіна, Венгрыя, Італія, Македонія, Малдова, Польшча, Румынія, Сербія, Славакія, Славенія, Украіна, Харватыя, Чарнагорыя, Чэхія.
Беларусь стала членам ЦЕІ ў чэрвені 1996 года, а ў 2017 годзе краіна ўпершыню прыняла на сябе старшынства ў ініцыятыве. Дэвіз старшынства - пашырэнне сумяшчальнасці ў Вялікай Еўропе. Пад гэтым разумецца развіццё ўсяго спектра спалучэнняў і ўзаемадзеянняў як паміж краінамі рэгіёна, так і рознымі інтэграцыйнымі пляцоўкамі, уключаючы ЕС, ЕАЭС, "Усходняе партнёрства" і іншыя арганізацыі.-0-
