15 сакавіка, Мінск /Кар. БЕЛТА/. Намеснік старшыні Палаты прадстаўнікоў Баляслаў Пірштук лічыць, што для Беларусі мець сваіх прадстаўнікоў у міжнародных органах кіравання палітычных арганізацый было б дастойна. Аб гэтым ён расказаў сёння журналістам, перадае карэспандэнт БЕЛТА.
Баляслаў Пірштук нагадаў, што пастаянны прадстаўнік Беларусі пры АБСЕ, Надзвычайны і Паўнамоцны Пасол Беларусі ў Аўстрыі Алена Купчына вылучана кандыдатам на пасаду генеральнага сакратара АБСЕ, аб чым напярэдадні праінфармавала МЗС. "Для Беларусі мець свайго прадстаўніка ў міжнародных органах кіравання палітычных арганізацый было б дастойна. У Алены Мікалаеўны, на мой погляд, вельмі добрыя шанцы перамагчы ў гэтым саперніцтве, і, вядома, я спадзяюся, што яна будзе там працаваць, будзе прадстаўляць і пашыраць інтарэсы Беларусі на еўрапейскіх пляцоўках", - сказаў віцэ-спікер.
Паўнамоцтвы дзеючага генеральнага сакратара АБСЕ Ламберта Дзаньера заканчваюцца 30 чэрвеня.-0-