10 кастрычніка, Мінск /Кар. БЕЛТА/. Краіны Садружнасці зацікаўлены ў захаванні членства Украіны ў СНД, заявіў сёння журналістам старшыня Выканаўчага камітэта - выканаўчы сакратар СНД Сяргей Лебедзеў, перадае карэспандэнт БЕЛТА.
Паводле яго слоў, тэма Украіны гучала ў верасні ў Душанбэ на пасяджэннях Савета міністраў замежных спраў і Савета кіраўнікоў дзяржаў СНД. "Са шкадаваннем канстатавалася адсутнасць на пасяджэннях украінскай дэлегацыі. Усе лічаць, што захаванне членства Украіны ў Садружнасці, яе ўдзелу ў інтэграцыйных пытаннях, пабудове добрых адносін з краінамі СНД у першую чаргу адпавядае інтарэсам Украіны. І, вядома, у гэтым зацікаўлены краіны Садружнасці, таму што мы суседзі і павінны ўзаемадзейнічаць", - сказаў Сяргей Лебедзеў.-0-
