Сцяг Пятніца, 29 сакавіка 2024
Усе навіны
Усе навіны
Палітыка
15 лістапада 2017, 16:07

Ярмошына дала рэкамендацыі патэнцыяльным кандыдатам у мясцовыя Саветы дэпутатаў

15 лістапада, Мінск /Кар. БЕЛТА/. Старшыня Цэнтрвыбаркама Беларусі Лідзія Ярмошына сёння, размаўляючы з журналістамі, дала рэкамендацыі жадаючым вылучацца ў мясцовыя Саветы дэпутатаў, перадае карэспандэнт БЕЛТА.

"Патэнцыяльным кандыдатам у дэпутаты пакуль трэба рыхтавацца. Перш за ўсё шукаць тых людзей, якія будуць збіраць за іх подпісы, або працоўныя калектывы (дарэчы, яны могуць там не працаваць), якія згодны вылучыць іх кандыдатамі ў дэпутаты", - сказала старшыня ЦВК.

Лідзія Ярмошына звярнула ўвагу патэнцыяльных кандыдатаў, што на гэтых выбарах дзейнічае "прынцып глебы", інакш кажучы вылучацца можна па тым мясцовым Савеце, дзе пражываеш і (або) працуеш. "Абавязкова павінен быць звязаны. Можна, вядома, не пражываць і не працаваць, але гэта толькі для работнікаў асобных устаноў, якія абслугоўваюць сацыяльныя патрэбы рэгіёна", - заўважыла яна. Напрыклад, у Мінску ёсць структуры, якія працуюць на Мінскую вобласць. Супрацоўнікі гэтых арганізацый, хоць яны пражываюць у горадзе Мінску, могуць выбірацца ў Мінскі абласны (або раённы) Савет.

Акрамя таго, кандыдатам у дэпутаты трэба ведаць, што яны могуць адначасова выбірацца па колькіх відах Саветаў, інакш кажучы, пражываючы на тэрыторыі, напрыклад, сельскай мясцовасці ў Гомельскай вобласці, можна выбірацца і ў сельскі Савет, дзе пражываеш, і ў раённы Савет, і нават у абласны. "А вось выбірацца адначасова ў Саветы аднаго ўзроўню нельга", - падкрэсліла Лідзія Ярмошына. Гэта азначае, што, калі чалавек пражывае ў горадзе Мінску, а працуе на тэрыторыі Мінскай вобласці, ён не можа адначасова вылучацца ў Мінскі абласны і ў Мінскі гарадскі Саветы, паколькі гэта Саветы аднаго ўзроўню. Усе тонкасці, паводле слоў Лідзіі Ярмошынай, ЦВК растлумачыць больш падрабязна пазней, непасрэдна перад вылучэннем кандыдатаў у дэпутаты.

Старшыня Цэнтрвыбаркама таксама расказала, што на мясцовых выбарах плануецца аднавіць практыку яе відэазваротаў, якія будуць інфармаваць грамадзян аб асноўных этапах і падзеях у ходзе выбарчай кампаніі.

У мясцовыя Саветы дэпутатаў плануецца выбраць крыху больш за 18 тыс. дэпутатаў (будзе ўтворана аналагічная колькасць выбарчых акруг). Выбарная кампанія павінна пачацца за тры месяцы да асноўнага дня галасавання (18 лютага), гэта значыць не пазней за 18 лістапада. Вылучэнне кандыдатаў праводзіцца традыцыйнымі спосабамі: ад палітычных партый, ад працоўных калектываў і ад грамадзян шляхам збору подпісаў. Дэпутатам мясцовага Савета можа быць выбраны грамадзянін Беларусі, які дасягнуў 18 гадоў, калі ён не мае судзімасці і пражывае на тэрыторыі адпаведнай адміністрацыйнай адзінкі або звязаны з ёй па прычыне прафесійнай дзейнасці. Таксама маюць права вылучацца грамадзяне Расіі, якія пастаянна пражываюць на тэрыторыі Беларусі.

Згодна з заканадаўствам, на выбарах такога ўзроўню няма парога яўкі, таму перамагае той, хто набраў большасць галасоў. Замежныя наглядальнікі для маніторынгу не запрашаюцца, выключэнне можа рабіцца для прадстаўнікоў акрэдытаванага дыпкорпуса. У цэлым жа ў маніторынгу заняты нацыянальныя наглядальнікі.

Плануецца, што бюджэт маючых адбыцца выбараў складзе каля $10,5 млн (прыкладна Br21,2 млн).-0-

Падпісвайцеся на нас у
Twitter
Топ-навіны
Свежыя навіны Беларусі