Сцяг Пятніца, 29 сакавіка 2024
Усе навіны
Усе навіны
Палітыка
23 мая 2016, 11:16

Італія заўсёды займала канструктыўную пазіцыю адносна Беларусі - Макей

23 мая, Мінск /Кар. БЕЛТА/. Італія заўсёды займала прагматычную канструктыўную пазіцыю адносна Беларусі, заявіў у праграме "Контуры" на тэлеканале АНТ міністр замежных спраў Беларусі Уладзімір Макей, паведамляе БЕЛТА.

"Для нас Італія была і застаецца важным гандлёва-эканамічным партнёрам. Больш таго, я хачу сказаць, што Італія заўсёды займала даволі прагматычную канструктыўную пазіцыю адносна Беларусі нават у перыяд некаторага абвастрэння нашых адносін з Еўрапейскім саюзам. Мы заўсёды знаходзілі шляхі ўзаемадзеяння ў той ці іншай сітуацыі", - адзначыў кіраўнік знешнепалітычнага ведамства.

Закранаючы нядаўні візіт Прэзідэнта Беларусі Аляксандра Лукашэнкі ў Італію, Уладзімір Макей нагадаў, што ён быў нацэлены на падтрыманне палітычных кантактаў, на развіццё гандлёва-эканамічнага ўзаемадзеяння. "У нас з Італіяй у лепшыя гады, а гэта было 2-3 гады таму, тавараабарот дасягаў больш як $2 млрд, - падкрэсліў ён. - На жаль, у мінулым годзе тавараабарот знізіўся практычна ў тры разы. І задача цяпер вывесці нашы гандлёва-эканамічныя адносіны на той узровень, якога мы дасягнулі раней". Таму асноўнай тэмай перагавораў Прэзідэнта Беларусі з Прэзідэнтам Італіі было развіццё гандлёва-эканамічнага ўзаемадзеяння з гэтай краінай, удакладніў Уладзімір Макей.

Візіт Аляксандра Лукашэнкі ў Італію, часткова можна разглядаць як сведчанне агульнага паляпшэння адносін Беларусі з Еўрасаюзам, сказаў кіраўнік МЗС. "На жаль, калі на нейкім этапе нашых адносін з Еўрасаюзам былі пэўныя праблемы, маю на ўвазе адпаведныя санкцыі, наўрад ці такі візіт быў бы магчымы. Але цяпер намецілася тэндэнцыя паляпшэння ўзаемаадносін з нашымі еўрапейскімі сябрамі, яны ідуць насустрач Беларусі па тых пытаннях, якія мы ўзнімаем і якія магчыма рэалізаваць цяпер", - падкрэсліў Уладзімір Макей.

"Не мы былі ініцыятарамі ўвядзення гэтых санкцый. На жаль, здарылася тое, што здарылася. І я асабіста лічу гэтыя гады страчаным часам як для Беларусі, так і для Еўрапейскага саюза, - адзначыў міністр замежных спраў. - Беларусь не з'яўляецца нейкім раздражняльнікам спакою ў рэгіёне, яна з'яўляецца донарам стабільнасці ў ім. Мы будзем паўтараць гэта да таго часу, пакуль гэта не будзе канчаткова ўспрынята".

У працяг тэмы Уладзімір Макей таксама адзначыў, што разуменне сапраўднай ролі Беларусі ў рэгіёне, самастойная незалежная пазіцыя па шэрагу пытанняў прывяла да больш пазітыўных адносін з ЕС, што вельмі важна. Гэтым трэба скарыстацца пачынаючы ад члена ўрада і да кіраўніка таго ці іншага суб'екта гаспадарання, лічыць ён. "Гэта значыць, неабходна рэалізаваць палітычную тэндэнцыю паляпшэння адносін з ЕС, якая намецілася, матэрыялізаваць яе, я сказаў бы, ператварыць у канкрэтныя гандлёва-эканамічныя дасягненні з той ці іншай краінай, чым мы цяпер і займаемся", - рэзюмаваў Уладзімір Макей.-0-

Падпісвайцеся на нас у
Twitter
Топ-навіны
Свежыя навіны Беларусі