14 мая, Мінск /Кар. БЕЛТА/. Генеральны сакратар АБСЕ Томас Грэмінгер прыме ўдзел у форуме "Усходняя Еўропа: у пошуках бяспекі для ўсіх", які пройдзе ў Мінску 23-25 мая. Аб гэтым паведаміў сёння на прэс-канферэнцыі каардынатар праграмы "Знешняя палітыка Беларусі" экспертнай ініцыятывы "Мінскі дыялог" Дзяніс Мельянцоў, перадае карэспандэнт БЕЛТА.
"На канферэнцыі будзе прадстаўлены нямецкі Бундэстаг, Еўрапейскі парламент, Еўразійская эканамічная камісія, будзе выступаць шэраг былых міністраў замежных спраў і міністраў абароны з еўрапейскіх дзяржаў. Выступіць былы генеральны сакратар АДКБ Мікалай Бардзюжа, дзеючы намеснік памочніка генсакратара НАТА Джэймс Апатурай. Таксама ў форуме прымуць удзел генеральны сакратар АБСЕ Томас Грэмінгер і беларускія афіцыйныя асобы", - расказаў Дзяніс Мельянцоў.
Усяго ў мерапрыемстве прымуць удзел больш за 350 экспертаў, даследчыкаў, палітыкаў і афіцыйных асоб. З іх звыш 200 чалавек - прадстаўнікі замежных краін. На форуме абмяркуюць, з якімі выклікамі сёння сутыкаецца Еўрапейскі рэгіён і якія канфлікты ўзнікаюць паміж краінамі, як іх неабходна папярэджваць і вырашаць. Асобная ўвага будзе ўдзелена развіццю ініцыятывы "Усходняе партнёрства", Еўразійскаму эканамічнаму саюзу, праекту "Адзін пояс і адзін шлях".
Паводле слоў кіраўніка экспертнай ініцыятывы "Мінскі дыялог" Яўгена Прэйгермана, такі форум у Беларусі плануецца праводзіць штогод. "Форум павінен паслужыць таму, каб выбудоўваць агульную карціну, у якой ёсць месца для ўсіх, хто павінен удзельнічаць у дыскусіі аб бяспецы ва Усходняй Еўропе, а можа, і шырэй - у Еўразіі. Гэта і краіны Захаду, як Еўрапейскі саюз, так і ЗША, Расія, невялікія дзяржавы Усходняй Еўропы, і, што прынцыпова важна, Кітай", - адзначыў ён.
Яўген Прэйгерман канстатаваў, што сёння ў свеце няма пляцовак, дзе б на самай справе праходзіла дыскусія. "Большасць нават вельмі вядомых міжнародных пляцовак ператвараецца ў частку інфармацыйна-прапагандысцкай вайны, якая паміж тым жа Захадам і Усходам развіваецца з усё большай сілай. І гэта, на наш погляд, вялікая праблема", - дадаў эксперт.-0-
