24 верасня, Мінск /Кар. БЕЛТА/. Беларускія і армянскія парламентарыі маюць намер развіваць рэгіянальнае супрацоўніцтва. Аб гэтым сёння журналістам паведаміў намеснік старшыні Палаты прадстаўнікоў Баляслаў Пірштук, перадае карэспандэнт БЕЛТА.
Беларусь з візітам наведвае дэлегацыя Нацыянальнага сходу Арменіі. Праграмай запланаваны сустрэчы ў Брэсцкім абласным выканаўчым камітэце, а таксама наведванне шэрага прадпрыемстваў Мінска і Брэста. Рэгіянальнае супрацоўніцтва будзе абмяркоўвацца ў абласным цэнтры. Паводле слоў Баляслава Пірштука, парламентарыі маюць намер прапрацаваць грунтоўна гэту тэму, вывучыць прапановы і намеціць узаемавыгадныя напрамкі. Віцэ-спікер выказаў упэўненасць, што бакам удасца знайсці новыя агульных падыходы двухбаковых адносін, у тым ліку ў сельскай гаспадарцы, ІТ і іншых сферах.
Баляслаў Пірштук адзначыў плённую работу беларускіх і армянскіх парламентарыяў на міжнародных пляцоўках. "У нас поўнае разуменне і кансалідаваная пазіцыя па многіх напрамках", - падкрэсліў ён.
Намеснік старшыні Нацыянальнага сходу Арменіі Эдуард Шармазанаў таксама адзначыў асаблівы характар адносін дзвюх краін. Ён дадаў, што парламентарыі са свайго боку павінны рабіць усё магчымае, каб узаемадзеянне Беларусі і Арменіі, саюзнікаў па ЕАЭС і АДКБ, было яшчэ больш плённым і на міжнароднай арэне, і ў гандлі.
У час сустрэчы бакі абмеркавалі шэраг гуманітарных пытанняў, у тым ліку ў частцы патрыятычнага выхавання моладзі, процістаяння спробам сказіць гісторыю Вялікай Айчыннай вайны.-0-
