20 ліпеня, Мінск /Кар. БЕЛТА/. Беларуская дзяржава заўсёды будавала адносіны з суседнімі краінамі на прынцыпах узаемавыгаднага гандлю. Аб гэтым міністр замежных спраў Беларусі Уладзімір Макей заявіў 19 ліпеня на прэзентацыі кнігі доктара гістарычных навук, прафесара Антонія Зунды і доктара гістарычных навук, прафесара Ілгварса Бутуліса "Гісторыя Латвіі", паведамілі БЕЛТА ў прэс-службе МЗС.
"Беларуская дзяржава заўсёды будавала адносіны з суседнімі дзяржавамі на прынцыпах узаемавыгаднага гандлю. Калі мы возьмем гарады старажытнай Полаччыны, то Заходняя Дзвіна (Даўгава) адыграла вялікую ролю для іх інтэнсіўнага развіцця. Рыга заўсёды была важным гандлёвым цэнтрам і для старажытнага Полацка, і для сучаснага Мінска. Шлях Дзвіна - Балтыйскае мора быў вельмі важны для развіцця гаспадаркі, эканомікі, беларускай дзяржавы таго часу. Гэта было тады. А цяпер фактычна тое ж самае", - сказаў Уладзімір Макей.
На прэзентацыі было адзначана, што кніга "Гісторыя Латвіі" ўпершыню была перакладзена на беларускую мову. "Мне здаецца, нам вельмі важна ведаць меркаванне навуковай грамадскасці Латвіі на падзеі, якія маюць дачыненне да гісторыі нашых краін. Вельмі важна, што кніга перакладзена на беларускую мову. Чаму? Мне здаецца, што гэта падкрэслівае павагу і імкненне Латвіі да падтрымання нацыянальнай ідэнтычнасці беларускага народа. Гэта вельмі важна, - звярнуў увагу міністр. - Беларусь і Латвію заўсёды звязвалі добрыя партнёрскія адносіны. Нашы гісторыі вельмі падобныя і блізкія: невялікія дзяржавы знаходзіліся ў фокусе інтарэсаў буйных дзяржаў, буйных геапалітычных ігракоў. Гэта накладвала свой адбітак на нашу гісторыю. Пры гэтым нашы культурныя, навуковыя, адукацыйныя традыцыі вельмі цесна пераплецены".
Міністр дадаў, што ў час яго сустрэчы з кіраўніком МЗС Латвіі, якая папярэднічала прэзентацыі выдання, абмяркоўвалася ў тым ліку ўзаемадзеянне дзвюх краін у транспартна-лагістычнай сферы. "Мы сёння знаходзімся на скрыжаванні транс'еўрапейскіх камунікацый, якія звязваюць Поўнач з Поўднем, Захад з Усходам. Мы павінны гаварыць аб тым, як умела скарыстацца гэтым геаграфічным становішчам. Тое, што было калісьці закладзена ў адносінах паміж нашымі дзяржавамі, гэты фундамент дае магчымасць нам сёння і далей развівацца", - заявіў ён.-0-
