22 чэрвеня, Мінск /Кар. БЕЛТА/. Беларусь выдатна спраўляецца з абавязкамі старшыні ЦЕІ, заявіў сёння журналістам міністр замежных спраў і знешняга гандлю Венгрыі Петэр Сіярта пасля перагавораў з міністрам замежных спраў Беларусі Уладзімірам Макеем, перадае карэспандэнт БЕЛТА.
"Я хацеў бы павіншаваць Беларусь па дзвюх прычынах. Па-першае, Беларусь выдатна спраўляецца са сваімі абавязкамі старшыні ЦЕІ, па-другое, калі мы ацэнім усе агульныя дасягненні апошнім часам - яны вельмі значныя", - падкрэсліў Петэр Сіярта.
Міністр адзначыў, што Венгрыя паважае і цэніць вынікі работы Беларусі і стараецца падштурхнуць агульныя еўрапейскія інстытуты да таго, каб гэтыя дасягненні былі па заслугах ацэнены.
Штогадовая сустрэча міністраў замежных спраў краін Цэнтральна-Еўрапейскай ініцыятывы (ЦЕІ) праходзіць 22 чэрвеня ў Мінску.
Асноўнай тэмай сустрэчы кіраўнікоў знешнепалітычных ведамстваў стане ўсё большая роля краін - членаў ЦЕІ ў пашырэнні сумяшчальнасці і ўзаемадапаўняльнасці розных інтэграцыйных працэсаў у Вялікай Еўропе, уключаючы аб'яднанне намаганняў у процістаянні новым пагрозам стабільнасці ў рэгіёне і ўмацаванне прагматычнага эканамічнага супрацоўніцтва паміж рознымі інтэграцыйнымі фарматамі. Дыпламаты абмяркуюць і рэфармаванне ЦЕІ ў святле новых выклікаў і змяненняў у рэгіёне Цэнтральнай і Паўднёва-Усходняй Еўропы, якія адбыліся за апошняе дзесяцігоддзе.-0-