22 верасня, Мінск /Кар. БЕЛТА/. Беларусь і ЗША падпісалі міжурадавае пагадненне аб абароне і захаванні некаторых культурных каштоўнасцей, паведамілі БЕЛТА ў МЗС Беларусі.
Цырымонія падпісання пагаднення адбылася 21 верасня ў час знаходжання міністра замежных спраў Беларусі Уладзіміра Макея ў Нью-Ёрку. У мерапрыемстве прынялі ўдзел прадстаўнікі кіраўніцтва Сусветнага яўрэйскага кангрэса, Дзяржаўнага дэпартамента ЗША.
Ад імя ўрада Беларусі пагадненне падпісаў Уладзімір Макей, а ад імя ўрада Злучаных Штатаў Амерыкі - старшыня Камісіі ЗША па ахове і захаванні культурных каштоўнасцей Леслі Уайс.
Кіраўнік беларускага знешнепалітычнага ведамства ў выступленні на цырымоніі падкрэсліў, што падпісанае пагадненне стварае трывалую юрыдычную аснову для міжурадавага супрацоўніцтва Беларусі і ЗША ў галіне аховы і абароны культурных каштоўнасцей. Гэта абумоўлена тым, што многія знакамітыя амерыканцы маюць беларускія карані і многія беларусы пакінулі свой след у амерыканскай гісторыі.
Уладзімір Макей адзначыў, што пагадненне сведчыць аб паляпшэнні палітычных адносін паміж дзвюма краінамі, прымаючы пад увагу, што Беларусь і ЗША не заключалі міжурадавых пагадненняў на працягу апошніх двух дзесяцігоддзяў.
Факт падпісання пагаднення пазітыўна ўспрыняты ўдзельнікамі цырымоніі. У сваіх выступленнях прадстаўнікі амерыканскага боку адзначалі важнасць сумеснай работы ўрада ЗША і ўрада Беларусі па рэалізацыі пагаднення на практыцы.
З прадстаўнікамі яўрэйскай грамадскасці дасягнуты дамоўленасці аб прадаўжэнні кантактаў, у першую чаргу ў сферы гандлёва-эканамічнага ўзаемадзеяння.
Камісія ЗША па ахове і захаванні культурных каштоўнасцей з'яўляецца ўстановай урада ЗША. Камісія займаецца пошукам і падрыхтоўкай дакладаў аб пахаваннях, манументах і гістарычных будынках ва Усходняй і Цэнтральнай Еўропе, якія звязаны са спадчынай грамадзян ЗША, а таксама ва ўзаемадзеянні з дзяржавамі гэтага рэгіёна аказвае садзейнічанне па абароне і захаванні гэтай уласнасці. Рэспубліка Беларусь стала 25 краінай, з якой падпісана пагадненне аб абароне і захаванні некаторых культурных каштоўнасцей. Членаў камісіі назначае прэзідэнт ЗША.-0-
