13 студзеня, Мінск /Кар. БЕЛТА/. Беларусь і Судан у час афіцыйнага візіту Прэзідэнта Беларусі Аляксандра Лукашэнкі плануюць падпісаць дагавор аб дружалюбных адносінах і супрацоўніцтве. Аб гэтым у інтэрв'ю БЕЛТА расказаў пасол Беларусі ў Егіпце і Судане па сумяшчальніцтве Сяргей Рачкоў.
"Плануецца падпісанне дагавора аб дружалюбных адносінах і супрацоўніцтве паміж Беларуссю і Суданам, мемарандумаў аб супрацоўніцтве ў прававой сферы, энергетыцы, адукацыі, шэрага камерцыйных кантрактаў і пратаколаў на пастаўку ў Судан камбайнаў, трактароў, грузавой аўтатэхнікі, сельскагаспадарчага абсталявання на агульную суму амаль $40 млн", - заявіў пасол.
У час візіту адбудзецца таксама беларуска-суданскі дзелавы форум, удзельнікі якога абмяркуюць канкрэтныя напрамкі гандлёва-эканамічнага супрацоўніцтва.
Паводле слоў Сяргея Рачкова, беларускі бок разглядае Судан у якасці аднаго з ключавых партнёраў у Афрыцы і імкнецца значна павысіць з ім узровень узаемадзеяння.
"На працягу апошніх трох гадоў мы значна рушылі наперад у развіцці двухбаковых адносін: увялі ў практыку штогадовыя палітычныя кансультацыі, аднавілі пасля дзесяцігадовага прастою дзейнасць міжурадавай камісіі па супрацоўніцтве, наладзілі прамое ўзаемадзеянне паміж міністэрствамі прамысловасці, сельскай гаспадаркі, нафты і энергетыкі, адукацыі", - сказаў дыпламат.
Паміж дзвюма краінамі таксама дынамічна развіваецца палітычны дыялог, гандлёва-эканамічнае і гуманітарнае супрацоўніцтва. Беларусь і Судан узаемадзейнічаюць у міжнародных арганізацыях, уключаючы ААН.
Двухбаковы гандаль паміж Беларуссю і Суданам фарміруецца практычна поўнасцю за кошт беларускага экспарту. Тавараабарот вырас з $15,4 млн у 2010 годзе да $41,3 млн па выніках 2015 года. Пры гэтым самыя высокія паказчыкі былі дасягнуты ў 2013 годзе - $70,8 млн.
Беларусь пастаўляе ў Судан трактары, грузавыя аўтамабілі, розныя віды станкоў, трансфарматары, кантрольна-вымяральныя прыборы, шыны.-0-