31 мая, Мінск /Кар. БЕЛТА/. Перспектывы сумеснай работы ў ААН абмеркавалі 31 мая на сустрэчы намеснік міністра замежных спраў Беларусі Валянцін Рыбакоў і Надзвычайны і Паўнамоцны Пасол Швецыі ў Беларусі Марцін Оберг, паведамілі БЕЛТА ў прэс-службе беларускага МЗС.
На сустрэчы бакі абмеркавалі магчымасці пашырэння супрацоўніцтва Беларусі і Швецыі ў сістэме ААН. "У якасці перспектыўных напрамкаў для сумеснай работы былі названы дасягненне Мэт устойлівага развіцця, міжнароднае тэхнічнае супрацоўніцтва, ажыццяўленне Парыжскага кліматычнага пагаднення, міжнароднае чарнобыльскае супрацоўніцтва, барацьба з гандлем людзьмі, забеспячэнне міжнароднай бяспекі, процідзеянне тэрарызму і іншыя", - праінфармавалі ў прэс-службе знешнепалітычнага ведамства.
Валянцін Рыбакоў і Марцін Оберг згадзіліся, што цеснае супрацоўніцтва па пытаннях шматбаковага парадку дня магло б унесці значны ўклад ва ўмацаванне двухбаковых адносін паміж Беларуссю і Швецыяй, дадалі ў прэс-службе.-0-
