1 жніўня, Мінск /Кар. БЕЛТА/. Беларусь і Германія абмеркавалі развіццё супрацоўніцтва ў парламенцкім і эканамічным вымярэнні. Аб гэтым ішла размова ў час сустрэчы намесніка міністра замежных спраў Беларусі Алега Краўчанкі з дэлегацыяй Парламенцкага форуму па сувязях з краінамі Цэнтральнай і Усходняй Еўропы федэральнай зямлі Саксонія (ФРГ), паведамілі БЕЛТА ў прэс-службе МЗС.
У склад дэлегацыі, якую ўзначаліў дзяржаўны міністр юстыцыі Саксоніі, старшыня Парламенцкага форуму Себасцьян Гемкаў, увайшлі больш за 10 дэпутатаў ландтага (зямельнага парламента) Саксоніі, прадстаўнікі дзелавых колаў і сферы адукацыі. У сустрэчы таксама прыняў удзел Надзвычайны і Паўнамоцны Пасол ФРГ у Беларусі Петэр Дэтмар.
Абмяркоўваліся перспектывы далейшага развіцця беларуска-германскага супрацоўніцтва, уключаючы парламенцкае і эканамічнае вымярэнні, пашырэнне ўзаемадзеяння паміж Беларуссю і Саксоніяй. Разгледжаны таксама асноўныя прыярытэты знешняй палітыкі Беларусі, актуальныя пытанні рэгіянальнага парадку дня.
Праграма візіту саксонскай дэлегацыі прадугледжвае шэраг сустрэч, наведванне Гродна і Нясвіжа.-0-
