Выязныя прыёмы застаюцца запатрабаванай формай узаемадзеяння з жыхарамі. Такое меркаванне журналістам выказаў памочнік Прэзідэнта - галоўны інспектар па Мінску Уладзімір Карпяк, перадае карэспандэнт БЕЛТА.
"Прыёмы штомесяц праводзяцца ў Мінгарвыканкаме, запісацца на сустрэчу вялікай праблемы не ўяўляе. Але запатрабаваны і выязныя прыёмы. Як правіла, яны праходзяць штоквартальна ў тых раёнах, дзе адзначаецца рост зваротаў. Гэта дазваляе зразумець, чаму адбыўся рост, наколькі эфектыўна працуюць мясцовыя органы ўлады", - адзначыў Уладзімір Карпяк.
Часцей за ўсё мінчане звяртаюцца па праблемах жыллёва-камунальнай гаспадаркі. Таксама ўзнімаюцца пытанні, звязаныя з нязгодай з судовым рашэннем або дзеяннямі прадпрыемстваў, арганізацый, ведамстваў. "У такіх выпадках даём растлумачэнні па працэдурах, як можна аспрэчыць рашэнне", - сказаў Уладзімір Карпяк.
Паводле яго слоў, узнімаемыя на прыёмах пытанні бяруцца на кантроль. Разам з тым не ўсе з іх можна аператыўна вырашыць, паколькі яны патрабуюць значных капітальных укладанняў. Так, для раёнаў новабудоўляў актуальна тэма будаўніцтва дзіцячых садоў. "Для гэтага мы і сустракаемся, каб разумець першачарговыя задачы для развіцця горада", - дадаў памочнік Прэзідэнта.
Сёння на прыёме грамадзян узнімаліся як асабістыя пытанні, так і выказваліся прапановы па ўдасканаленні агульнагарадской інфраструктуры, захаванні зялёных зон.
