Выязныя прыёмы грамадзян дапамогуць адкарэкціраваць практыку прымянення норм дэкрэта нумар 3. Аб гэтым паведаміў журналістам у час выязнога прыёму па рэалізацыі норм дэкрэта ў Іўі намеснік кіраўніка Адміністрацыі Прэзідэнта Валерый Міцкевіч, перадае карэспандэнт БЕЛТА.
Анонс аб правядзенні прыёму па гэтым пытанні выклікаў актыўны водгук мясцовага насельніцтва: на прыём у Іўі запісаліся 36 чалавек, больш за 30 грамадзян чакаюць прыёму намесніка кіраўніка Адміністрацыі Прэзідэнта ў Лідзе. "Дэкрэт нумар 3 выклікаў актыўнае абмеркаванне ў СМІ і сярод насельніцтва, менавіта таму Адміністрацыя Прэзідэнта праводзіць маніторынг рэалізацыі яго норм з выездам на месцы. Мы вывучаем, ці ёсць цяжкасці ў выкананні дэкрэта, якія праблемы заяўляюць людзі. На першы погляд, спектр пытанняў грамадзян разнастайны, але асноўныя звязаны з прымяненнем норм дэкрэта і таго, па якіх крытэрыях можна ацэньваць цяжкую сітуацыю. Гэта зразумела, паколькі райвыканкамы ўпершыню пачалі працаваць па гэтым дакуменце", - адзначыў Валерый Міцкевіч. Па выніках выязных прыёмаў Адміністрацыя Прэзідэнта правядзе аналіз праблем грамадзян, работы па выкананні норм дэкрэта нумар 3.
Самым актуальным пытаннем для Іўя стала прылічэнне да асоб, абавязаных пакрываць дзяржрасходы, вытворцаў сельгаспрадукцыі на прысядзібных участках. Праблема тыповая для Іўя і, як адзначыў намеснік кіраўніка Адміністрацыі Прэзідэнта, яшчэ некалькіх населеных пунктаў краіны. Райцэнтр лічыцца горадам, у той жа час тут пражывае ўсяго 8 тыс. чалавек, а асноўная частка забудовы - індывідуальная. У горадзе каля 300 чалавек жывуць за кошт работы на прысядзібных участках - маюць цяпліцы, вырошчваюць і прадаюць сельгаспрадукцыю. Тыя, хто займаецца такім жа відам дзейнасці ў вёсцы, ад збору вызвалены, а гараджане трапілі пад дзеянне дэкрэта. Таму жыхары Іўя прапаноўвалі змяніць заканадаўчыя нормы, ураўнаваўшы ўмовы для вяскоўцаў і жыхароў такіх малых гарадоў. "Так ці інакш, падатковы перыяд прайшоў ужо, таму закон павінен выконвацца. Вырашыць пытанне "оптам" райвыканкам не зможа, але па кожным такім плацельшчыку трэба будзе прыняць персанальнае рашэнне аб знаходжанні ў цяжкай сітуацыі. У далейшым, вядома, тэму трэба абмяркоўваць, паколькі людзі займаюцца важнай і патрэбнай справай", - сказаў Валерый Міцкевіч.
Старшыня райвыканкама Аляксандр Булак паведаміў таксама тым, хто звярнуўся, што ў любой кропцы Іўеўскага раёна гатовы выдзеліць зямлю для вядзення фермерскай гаспадаркі. Гэта альтэрнатыўны варыянт для арганізацыі занятасці насельніцтва, лічыць ён.
Два пытанні вырашыліся літаральна за пяць мінут. Жанчына прыйшла на прыём з-за сына. Яму прыслалі паведамленне, паколькі пасля вяртання з арміі ў маладога чалавека пайшоў пэўны час на працаўладкаванне, афармленне даведак і навучанне для далейшай работы ў МУС. Рашэнне будзе прынята адназначнае - вызваліць. Такая сітуацыя - у яшчэ адной жыхаркі раёна. "Гэта якраз той выпадак, які паказвае, што ўсе жыццёвыя акалічнасці прадугледзець у адным дакуменце немагчыма. Менавіта таму закладзена такая норма, як цяжкая жыццёвая сітуацыя", - растлумачыў Валерый Міцкевіч. Да такога ж выключнага выпадку можна аднесці сітуацыі, калі чалавек траціць час, напрыклад, на рэабілітацыю пасля лячэння.
Спрэчным палічылі выпадак маладой жанчыны, якая даглядае маму-інваліда. Для гэтага яна пакінула работу кантралёра-касіра ў Мінску. Прыехаў у Іўе таксама яе муж, у выніку каля года ўся сям'я не працуе і жыве на пенсію хворай жанчыны, спасылаючыся на адсутнасць работы ў райцэнтры. У камісіі ўзніклі пытанні аб злоўжыванні ў сям'і спіртным. Таму яна не спяшаецца даверыць дачцэ догляд маці-інваліда, прапануючы сацыяльны ложак. Па даручэнні Валерыя Міцкевіча сітуацыю сям'і яшчэ раз разгледзяць на камісіі. Пры гэтым ён прапанаваў мужа і жонку працаўладкаваць. Дачцэ трэба будзе пераканаць камісію ў тым, што яе паводзіны змяніліся і яна гатова даглядаць маці.
Не працуе з-за неабходнасці даглядаць 90-гадовую маці і яшчэ адна жанчына, якая прыйшла на прыём. Пры гэтым за дапамогай не звярталася. Падатковая інспекцыя палічыла жанчыну працаздольнага ўзросту абавязанай пакрываць дзяржаўныя расходы і прыслала паведамленне. Калі б дачка прадаставіла патрэбныя дакументы яшчэ ў студзені, не давялося б звяртацца на прыём сёння. Дэ-юрэ ёсць падставы для задавальнення заявы грамадзянкі на вызваленне ад збору. Пытанне разгледзяць на камісіі створанай для гэтага ў раёне рабочай групы.
Выязным прыёмам скарысталіся грамадзяне, каб задаць злабадзённыя пытанні і па іншых тэмах. Сярод іх - жыллёвыя пытанні, тэма якасці пітной вады, рэалізацыі сельскагаспадарчай прадукцыі.
