Сумеснае стратэгічнае вучэнне ўзброеных сіл Беларусі і Расіі "Захад-2017" адпавядае крытэрыям адкрытасці і празрыстасці. Такое меркаванне карэспандэнту БЕЛТА выказаў эксперт у галіне ваеннай бяспекі Аляксандр Цішчанка.
Колькасць асабовага складу, што ўдзельнічае ў вучэнні, складае каля 12,7 тыс. ваеннаслужачых. Згодна з Венскім дакументам 2011 года, пры такой колькасці ўдзельнікаў прысутнасць наглядальнікаў неабавязковая, адзначыў эксперт. "Але беларускі бок імкнецца зрабіць гэтыя вучэнні празрыстымі і зразумелымі для ўсіх, паколькі вакол іх спрабуюць нагнятаць нейкія праблемныя пытанні. І колькасць наглядальнікаў, і акрэдытаваных СМІ поўнасцю адпавядае крытэрыям празрыстасці, адкрытасці і зразумеласці гэтых вучэнняў", - падкрэсліў ён.
У аснову задумы "Захад-2017" пакладзены варыянт узнікнення крызіснай сітуацыі і нарастання канфлікту, звязаны з павелічэннем актыўнасці незаконных узброеных фарміраванняў, міжнародных сепаратысцкіх і тэрарыстычных арганізацый, маючых знешнюю падтрымку. Аляксандр Цішчанка звярнуў увагу, што легенда вучэння - гэта вынік "глыбокага аналізу сучаснай абстаноўкі, войнаў, баявых дзеянняў па ўсім свеце". У якасці прыкладу ён прывёў Сірыю, дзе тэрарыстычная арганізацыя "Ісламская дзяржава" стала своеасаблівым кангламератам небяспекі для рэгіёна ў цэлым.
Беларусь і Расія адпрацоўваюць сцэнарый, калі праблема толькі ўзнікла і ўмоўны праціўнік зрабіў спробу дэстабілізаваць абстаноўку на беларускай тэрыторыі і дабіцца пагаршэння адносін у Саюзнай дзяржаве. Па такім сцэнарыі пачыналіся ўсе ўзброеныя канфлікты апошнім часам. Рэгіянальная групоўка войскаў (сіл) Беларусі і Расіі на вучэннях адпрацоўвае ў першую чаргу пытанні ўзгодненасці, зладжанага ўзаемадзеяння і эфектыўнага вырашэння задач у залежнасці ад узнікаючай небяспекі. Такія вучэнні прызначаны садзейнічаць умацаванню бяспекі і стабільнасці ў рэгіёне, рэзюмаваў эксперт.
Сумеснае стратэгічнае вучэнне ўзброеных сіл Беларусі і Расіі "Захад-2017" пачалося 14 верасня. Вучэнне прадоўжыцца да 20 верасня. На тэрыторыі Беларусі задзейнічаны палігоны Лепельскі, Барысаўскі, Лосвіда, Асіповіцкі, два палігоны ВПС і войскаў ППА - Ружанскі і Даманаўскі, а таксама два ўчасткі мясцовасці ў Віцебскай вобласці - Дрэтунь і Глыбокае. У Расіі яно праходзіць на палігонах Лужскі, Стругі Чырвоныя і Праўдзінскі ў Калінінградскай, Ленінградскай і Пскоўскай абласцях.
Беларусь запрасіла для назірання за вучэннем прадстаўнікоў міжнародных арганізацый: ААН, АБСЕ, Арганізацыі Паўночнаатлантычнага дагавора, СНД, АДКБ, Міжнароднага камітэта Чырвонага Крыжа, а таксама ваенна-дыпламатычнага корпуса замежных дзяржаў, акрэдытаваных пры пасольствах сваіх краін у Беларусі - усяго больш за 80 чалавек. На вучэнне прыедуць і ваенныя наглядальнікі з Латвіі, Літвы, Польшчы, Украіны, Эстоніі, Швецыі і Нарвегіі.
Ход вучэння будзе шырока асвятляцца ў СМІ. Журналісты ў перыяд яго актыўнай фазы - 17-19 верасня - змогуць выехаць на палігоны, дзе будуць праводзіцца розыгрышы ваенных дзеянняў: Ружанскі, Асіповіцкі і Даманаўскі. Акрамя таго, з 14 верасня праводзіцца штодзённы брыфінг для акрэдытаваных журналістаў афіцыйнага прадстаўніка Міністэрства абароны аб задачах, што вырашаюцца ў ходзе вучэння, па выніках кожнага дня. Вялікую зацікаўленасць у асвятленні вучэнняў выказалі замежныя СМІ. У адрас беларускага боку паступіла беспрэцэдэнтная колькасць зваротаў з просьбай аб акрэдытацыі - каля 270. Заяўкі атрыманы ад інфармагенцтваў, выданняў і тэлеканалаў з усіх краін-суседзяў, а таксама Вялікабрытаніі, Германіі, Даніі, Канады, Нідэрландаў, Нарвегіі, ЗША, Турцыі, Фінляндыі, Францыі, Швецыі. Вучэнні будуць асвятляць і журналісты з Катара, Рэспублікі Карэя, Японіі.
