Усім краінам пара аб'яднацца ў барацьбе з прапагандай тэрарызму і экстрэмізму ў інтэрнэце. Такое меркаванне ў час тэлепраграмы "Клуб рэдактараў" у суботнім эфіры канала "Беларусь 1" агучыў старшыня Нацыянальнай дзяржаўнай тэлерадыёкампаніі Генадзь Давыдзька, паведамляе БЕЛТА.
"Слова - гэта зброя. Нашэнне зброі забаронена, а нашэнне слоў - не. Але слова забівае часам мацней, чым зброя", - адзначыў ён.
На думку Генадзя Давыдзькі, калі б СМІ перасталі асвятляць тэракты, гэта было б рэальным згаворам супраць тэрарызму. "Забаронена рэклама тытуню, алкаголю, наркотыкаў, а рэклама аб тэрарызме не забаронена, таму што антырэклама - паведамленні аб іх, гэта таксама рэклама. Дык, можа, пара парламентам усіх краін аб'яднацца і не гаварыць аб учыненым тэракце?", - сказаў ён.
У сваю чаргу галоўны рэдактар газеты "СБ. Беларусь сегодня" Павел Якубовіч дадаў, што настаў час пераглядаць існуючыя стэрэатыпы ў частцы распаўсюджвання інфармацыі ў інтэрнэце. "Калі твітар, сацсеткі і іншыя новыя тэхналогіі вядуць чалавецтва да канфрантацыі, калі знішчаюцца такія паняцці, як бяспека, інстытуты дзяржаўныя і сямейныя, калі з'яўляецца ІДІЛ, кожная дзяржава павінна разумець, што не можа быць ізалявана. Патрэбна нейкая ўсепланетная нарада, абмен думкамі - што рабіць? Таму што ўсё часцей мы сутыкаемся з тым, што тэхналогіі выходзяць з-пад кантролю людзей", - адзначыў ён.
Таксама ўдзельнікі "Клуба рэдактараў" абмеркавалі пытанне свабоды слова. "Такія паняцці, як свабода слова і свабода выказвання вельмі важны для руху цывілізацыі наперад - калі людзі маюць магчымасць абменьвацца думкамі, калі кожны жадаючы можа стаць крыніцай нейкай камунікацыі. Гэта ўсё робіць нас, зямлян, грамадствам, якое дастойна адказвае на ўсё, што адбываецца, - сказаў Павел Якубовіч. - Але разам з тым гэта выклікае пачуццё значна большае, чым прыкрасць, таму што свабода слова - вельмі далікатны, тонкі і небяспечны інструмент. Напрыклад, ці дапушчальна свабода слова, калі ў перапоўненым кінатэатры нехта нечакана ўстане і крыкне "Пажар!" - Можа ўзнікнуць цісканіна".
