У рабоце Беларусі і Сусветнага банка патрэбны новы парадак дня. Такое меркаванне выказаў старшыня Савета Рэспублікі Міхаіл Мясніковіч 28 сакавіка на сустрэчы з дэлегацыяй СБ, перадае карэспандэнт БЕЛТА.
"У прынцыпе, мы задаволены работай з групай Сусветнага банка. Вядома, хацелася б большага, але я думаю, што наша сустрэча і ваш візіт у цэлым будуць садзейнічаць таму, каб мы адкрывалі больш сістэмных сумесных праектаў", - сказаў Міхаіл Мясніковіч.
"Мне здаецца, у рабоце з Беларуссю патрэбны нейкі новы парадак дня, я сказаў бы, абсалютна новы напрамак", - адзначыў старшыня верхняй палаты парламента. У прыватнасці, ён прапанаваў падумаць над праектамі ў галіне электрычнага транспарту. Паводле слоў Міхаіла Мясніковіча, цяпер усё больш увагі ўдзяляецца тэхналогіям і абсталяванню для забеспячэння здароўя чалавека. "Таму пытанні, якія датычацца біяпрэпаратаў, ствалавых клетак, цэнтраў трансплантацыі органаў чалавека, стварэння ўсёй гэтай біяінфраструктуры маглі б быць вельмі цікавымі і для Сусветнага банка, і для нашай краіны, тым больш у рамках Еўразійскага эканамічнага саюза", - лічыць спікер.
