У Беларусі наспела неабходнасць прыняцця новай праграмы адраджэння і развіцця вёскі. Такое меркаванне выказаў сёння старшыня Віцебскага абласнога Савета дэпутатаў Уладзімір Цярэнцьеў, выступаючы на V Усебеларускім народным сходзе, перадае карэспандэнт БЕЛТА.
На думку Уладзіміра Цярэнцьева, пільную ўвагу трэба ўдзяляць стану спраў у малых населеных пунктах, аказваць дапамогу і падтрымку людзям, якія там пражываюць. "Гэта зона нашай адказнасці, Саветаў дэпутатаў, - адзначыў ён. - Мы думаем, што, можа, наспела неабходнасць прыняцця новай праграмы адраджэння і развіцця вёскі. Нельга дапусціць, каб гэтыя вёскі зніклі з карты нашай краіны".
"Ёсць шмат спосабаў захавання - гэта развіццё аграэкатурызму, фермерскай гаспадаркі, падтрымка з боку буйных аграгарадкоў. Гэта пытанне патрабуе абмеркавання не толькі мясцовых органаў улады, але і на ўзроўні ўрада", - перакананы дэлегат.
Уладзімір Цярэнцьеў таксама выказаў меркаванне, што ў бягучай пяцігодцы неабходна рэалізаваць праект па стварэнні холдынга "Беларускі лён", дзе галоўным лакаматывам пасля мадэрнізацыі стане Аршанскі льнокамбінат. "Ён павінен аб'яднаць прадпрыемствы ў вытворчым ланцужку ад поля да прылаўка", - заўважыў старшыня Віцебскага абласнога Савета дэпутатаў.
Ён дадаў, што сярод прыярытэтаў для рэгіёна на бліжэйшыя гады - стварэнне рабочых месц і прыцягненне інвестыцый, захаванне дадатнай дынамікі развіцця.