Расійска-беларускія адносіны характарызуюцца самым высокім на прасторы СНД узроўнем інтэграцыі ва ўсіх сферах - гандлёва-эканамічнай і палітычнай, гуманітарнай і ваенна-тэхнічнай. Аб гэтым заявіў статс-сакратар - намеснік міністра замежных спраў Расіі Рыгор Карасін 27 чэрвеня ў пасольстве Беларусі ў Расіі на ўрачыстым прыёме з нагоды Дня Незалежнасці Беларусі, перадае карэспандэнт БЕЛТА.
"Дасягнуты значныя вынікі, якія ўплываюць непасрэдна на жыццё радавых грамадзян нашых дзяржаў: свабоднае працаўладкаванне, магчымасць атрымліваць вышэйшую адукацыю, медыцынскую дапамогу, бесперашкоднае перамяшчэнне людзей і тавараў, зняцце многіх бюракратычных перашкод", - сказаў Рыгор Карасін.
Ён адзначыў, што беларусы і расіяне сталі першымі, хто зразумеў згубнасць распаду Савецкага Саюза. "Менавіта гэтым быў стымуляваны рух да інтэграцыі, які потым быў падхоплены ў больш шырокім геаграфічным плане іншымі краінамі на прасторы СНД, - падкрэсліў Рыгор Карасін. - Адразу пасля ўстанаўлення ў 1992 годзе дыпламатычных адносін паміж Расіяй і Беларуссю - 25-годдзе гэтай падзеі мы адзначалі гэтымі днямі - быў падпісаны шэраг пагадненняў, якія вызначаюць умовы ўзаемадзеяння ў ваеннай, фінансавай, гандлёва-эканамічнай, транспартнай, энергетычнай, сацыяльнай і іншых галінах двухбаковага супрацоўніцтва. Так пачаўся вялікі інтэграцыйны шлях".
"Сёння мы можам з задавальненнем сказаць, што ўрэгуляваны праблемы і намечаны крокі для вырашэння комплексу задач, звязаных з энергетыкай, развіццём прамысловай кааперацыі, стымуляваннем інвестыцый, стварэннем умоў для роўнага доступу на рынкі адзін аднаго", - заявіў намеснік кіраўніка расійскага знешнепалітычнага ведамства.
Адметнай рысай двухбаковага супрацоўніцтва Рыгор Карасін назваў сувязі па лініі рэгіёнаў Беларусі і Расіі. "З году ў год павялічваецца колькасць жадаючых прыняць удзел у штогадовым Форуме рэгіёнаў Расіі і Беларусі - чацвёрты па ліку будзе праходзіць у Маскве 29-30 чэрвеня, - сказаў дыпламат. - Яго тэма - інавацыі, навука і інфармацыйныя тэхналогіі. Паводле ацэнак арганізатараў мерапрыемства, нашы краіны плануюць падпісаць шэраг кантрактаў на больш як $400 млн".