Прыёмы грамадзян важныя для ўдасканалення работы праваахоўных органаў. Такое меркаванне карэспандэнту БЕЛТА выказаў міністр унутраных спраў Беларусі Ігар Шуневіч, які 12 ліпеня правёў асабісты прыём грамадзян у Савеце Міністраў.
"Сапраўды, мы не заўсёды кампетэнтныя на ўзроўні першай інстанцыі, і на гэта ёсць шмат прычын, у тым ліку нейкая прафесійная негатоўнасць да вырашэння вельмі складаных, часта застарэлых пытанняў. Асабістыя прыёмы, сустрэчы з людзьмі для супрацоўнікаў органаў унутраных спраў заўсёды былі асноўнай формай атрымання інфармацыі. Любая дапамога грамадзян вітаецца, без прыцягнення грамадскасці, у прыватнасці, добраахвотных народных дружын, складана забяспечыць на належным узроўні правапарадак", - адзначыў Ігар Шуневіч.
Сустракаюцца і выпадкі фармалізму ў рабоце. У прыклад ён прывёў зварот адной з заяўніц, якую аштрафавалі за паркоўку на месцы для людзей з амежаванымі магчымасцямі, а на машыне проста дажджом змыла спецыяльную наклейку. "Работнікі праваахоўных органаў з пункту гледжання закона зрабілі правільна, але фармальна. З такімі фактамі трэба змагацца", - лічыць міністр.
У цэлым Ігар Шуневіч адзначыў станоўчую тэндэнцыю змяншэння зваротаў грамадзян у ведамства, у тым ліку абгрунтаваных. У той жа час некаторыя пытанні, якія паступаюць у час прамых ліній, асабістых прыёмаў, маюць даўнюю гісторыю або звязаны з міжасобаснымі ўзаемаадносінамі, і бывае складана аказаць садзейнічанне ў іх вырашэнні.
На прыёме ў Савеце Міністраў грамадзяне ўзнімалі тэмы абскарджання рашэнняў у частцы непрыцягнення да адміністрацыйнай адказнасці службовых асоб за парушэнні тэхналогіі ўкладкі дарожнага пакрыцця, правамернасці арганізацыі адсялення жыхароў і зносу жылых дамоў, неналежнага выканання службовых абавязкаў работнікамі, умоў адбывання пакарання ў месцах пазбаўлення волі і інш.