Пераход на электроннае правасуддзе дасць магчымасць зрабіць судовы працэс максімальна сучасным. Такое меркаванне 1 снежня ў час адкрыцця новага будынка суда Слонімскага раёна выказаў старшыня Вярхоўнага суда Валянцін Сукала, перадае карэспандэнт БЕЛТА.
"Мы актыўна ўкараняем электронныя формы ў наша справаводства. Магчыма, у бліжэйшым будучым мы пяройдзем на электроннае правасуддзе. Яно не заменіць фігуру суддзі, але ўсё, што адбываецца ў час працэсу, будзе фіксавацца на электронныя носьбіты, аўдыя і відэа. Гэта зробіць непатрэбнай фігуру судовага сакратара, мы зможам адысці ад руціны, ад папяровых носьбітаў", - адзначыў Валянцін Сукала.
"У такой сучаснай форме плануем і далейшае развіццё судовай рэформы. Мы ў курсе, у трэндзе сучасных тэндэнцый і, як бачыце, стараемся іх максімальна выкарыстоўваць", - расказаў старшыня Вярхоўнага суда. У якасці прыкладу ён прывёў новы будынак суда Слонімскага раёна, тэхнічнае аснашчэнне якога адпавядае правасуддзю наступнага пакалення.
"Калі гаварыць пра новыя напрамкі ў судовай дзейнасці, то мы, вядома, перайшлі на сучасны апеляцыйны працэс у крымінальным правасуддзі, плануем у бліжэйшым будучым перайсці на такі ж сучасны апеляцыйны працэс у грамадзянскім правасуддзі. Шмат зрабілі для развіцця прымірыцельных і аднаўленчых працэдур", - адзначыў Валянцін Сукала.
1 снежня ў Слоніме ва ўрачыстай абстаноўцы ў строй увялі ўніверсальны комплексны чатырохпавярховы будынак. На плошчы амаль 6,5 тыс. кв.м размясціўся суд Слонімскага раёна, юрыдычная кансультацыя, аддзел прымусовага выканання пакаранняў, а таксама ваенны камісарыят Слонімскага і Зэльвенскага раёнаў.