Паляпшэнне пазіцый Беларусі ў рэйтынгу Doing Business будзе садзейнічаць прыцягненню інвестыцый у краіну, заявіў карэспандэнту БЕЛТА дэкан эканамічнага факультэта Беларускага дзяржаўнага ўніверсітэта прафесар Міхаіл Кавалёў.
"Рэйтынг Doing Business у першую чаргу фіксуе ўмовы для нацыянальнага бізнесу. Зразумела, што замежныя інвестары ведаюць вынікі рэйтынгу і, безумоўна, будуць на яго арыентавацца. А думаю, што інвестыцыі з-за мяжы, асабліва з ЕС, пачнуць павялічвацца", - адзначыў дэкан эканамічнага факультэта БДУ.
Пры гэтым Міхаіл Кавалёў звярнуў увагу на тое, што ў многіх краін, у тым ліку суседзяў Беларусі Польшчы, Літвы і Латвіі, рэйтынгі яшчэ вышэйшыя. "Гэта значыць, што за замежныя інвестыцыі трэба змагацца. Цяпер нам крыху перашкаджаюць санкцыі супраць Расіі. У Беларусь інвестар прыходзіць не толькі, каб весці справы на тэрыторыі нашай краіны, але каб і прадаваць свае тавары ў РФ. Гэта палеміка Расіі з ЕС не садзейнічае прыцягненню інвестыцый, у тым ліку і ў Беларусь", - растлумачыў ён.
Эксперт таксама падкрэсліў, што Беларусь за апошнія пяць гадоў зрабіла значны рывок у паляпшэнні ўмоў вядзення бізнесу. "Мы ўвайшлі ў дзясятку лепшых краін свету па праведзеных рэформах. У прыватнасці, на сайце Сусветнага банка адзначана, што за апошні год мы істотна палепшылі сістэму крэдытных гісторый, спрасцілі працэдуры падключэння да электрасетак і зрабілі больш празрыстымі і выразнымі працэдуры абароны мінарытарыяў (уладальнікаў невялікіх пакетаў акцый). Таму я ўпэўнены, што калі мы прадоўжым такімі ж тэмпамі, то праз пару гадоў увойдзем у трыццатку рэйтынгу Doing Business", - канстатаваў Міхаіл Кавалёў.
Як паведамлялася, Беларусь заняла ў рэйтынгу Doing Business 2017 ("Вядзенне бізнесу - 2017") 37-ю пазіцыю сярод 190 дзяржаў. У мінулым годзе краіна знаходзілася на 50-м месцы. Як падкрэслілі ў Сусветным банку, паводле даных апошняга даклада, Беларусь увайшла ў дзясятку вядучых краін свету па правядзенні рэформ, спрыяльных для бізнесу.
У глабальным рэйтынгу лідарам стала Новая Зеландыя, перамясціўшы на другое месца Сінгапур. У дзясятцы краін з найбольш спрыяльнымі ўмовамі для прадпрымальніцкай дзейнасці за імі ідуць Данія, Ганконг (Кітай), Рэспубліка Карэя, Нарвегія, Вялікабрытанія, ЗША, Швецыя і Македонія.
Сярод краін постсавецкай прасторы самае высокае месца займае Эстонія - 12-е. За ёй ідуць Латвія (14-е), Грузія (16-е) і Літва (21-е). Далей размясціліся Казахстан (35-е), Арменія (38-е), Расія (40-е), Малдова (44-е), Азербайджан (65-е), Кыргызстан (75-е), Украіна (80-е), Узбекістан (87-е), Таджыкістан (128-е).