У Беларусі павінна быць больш дыферэнцыраваных тарыфаў на электраэнергію. Такое меркаванне выказаў 17 жніўня старшыня Савета Рэспублікі Міхаіл Мясніковіч, падводзячы вынікі пашыранага Прэзідыума Савета Рэспублікі і Савета па ўзаемадзеянні органаў мясцовага самакіравання пры верхняй палаце парламента, перадае карэспандэнт БЕЛТА.
Спікер перакананы, што дыферэнцыраванымі тарыфамі ў Беларусі трэба займацца больш глыбока і больш актыўна прапагандаваць іх выкарыстанне сярод насельніцтва. Так званы тарыфны сшытак, адзначыў ён, павінен быць больш аб'ёмны, ступень дыферэнцыяцыі - большай. "У чалавека павінна быць магчымасць скарыстацца льготным тарыфам на працягу сутак або тыдня, каб выконваць энергазатратныя работы дома. Тое ж для прамысловых прадпрыемстваў", - лічыць Міхаіл Мясніковіч.
У Беларусі ўжо дзейнічаюць тарыфы, дыферэнцыраваныя па часе, калі энергасістэма адчувае максімальную і мінімальную нагрузку. У некаторых выпадках розніца можа дасягаць трохкратнага памеру.
У сувязі з будаўніцтвам БелАЭС у краіне распрацоўваюцца меры для стымулявання спажывання электраэнергіі. Як расказаў на пасяджэнні намеснік міністра антыманапольнага рэгулявання і гандлю Іван Вежнавец, МАРГ сумесна з міністэрствамі жыллёва-камунальнай гаспадаркі і энергетыкі прапрацавалі два напрамкі для стымулявання спажывання электраэнергіі. Так, ведамствы ўстанавілі тарыф для электракацельняў, якія плануюцца да ўводу. Ён узгоднены і будзе прымяняцца для эксперыментальных кацельняў. Тарыф плануецца дыферэнцыраваць па перыядах максімальнай і мінімальнай загрузкі энергасістэмы.
Такі ж падыход плануецца закласці для насельніцтва ў частцы электраспажывання для нагрэву вады і ацяплення. Адпаведныя прапановы падрыхтаваны і ў бліжэйшы час будуць унесены ва ўрад, праінфармаваў намеснік міністра.
На пасяджэнні абмяркоўваліся пытанні развіцця жыллёва-камунальнай гаспадаркі, у тым ліку тарыфная палітыка, пытанні капітальнага рамонту жылфонду, удасканалення нарматыўнай прававой базы і іншыя.