Маладыя сем'і на конкурсе "Уладар вёскі" яскрава прадстаўляюць традыцыі сваіх рэгіёнаў. Такое меркаванне выказаў 21 кастрычніка журналістам першы сакратар ЦК ГА "Беларускі рэспубліканскі саюз моладзі" Андрэй Белякоў у час фіналу рэспубліканскага сямейнага праекта "Уладар вёскі", перадае карэспандэнт БЕЛТА.
"Калі конкурс толькі з'явіўся, то асноўная яго задача была папулярызаваць працу і жыццё ў вёсцы. А сёння маладыя людзі, якія ўдзельнічаюць у конкурсе, з'яўляюцца прыкладам таго, як павінна выглядаць сапраўдная сям'я, - падкрэсліў Андрэй Белякоў. - Вельмі важна, што гэтыя маладыя сем'і захоўваюць традыцыі сваіх рэгіёнаў, продкаў. І свае веды перадаюць ужо сваім дзецям. Усё гэта - выхаванне маладога пакалення ў лепшых традыцыях нашай краіны. Тое, што сёння сем'і з усіх куткоў Беларусі прымаюць удзел у праекце, сведчыць аб тым, што ён запатрабаваны, патрэбны і цікавы". Такія праекты заўсёды збіраюць вялікія сем'і і шматлікія групы падтрымкі.
Фінал рэспубліканскага сямейнага сельскагаспадарчага праекта "Уладар вёскі" праходзіць у Мінскай вобласці. Галоўныя героі папулярнага маладзёжнага праекта - шэсць беларускіх сем'яў з розных куткоў Беларусі. Яны перамаглі ўжо ў раённых і абласных этапах праекта, цяпер разам са сваімі дзецьмі спаборнічаюць за тытул "Уладар вёскі-2016" у творчых і сельскагаспадарчых конкурсах.
Арганізатарам "Уладара вёскі" выступае Беларускі рэспубліканскі саюз моладзі пры падтрымцы Белтэлерадыёкампаніі, Міністэрства адукацыі, Міністэрства сельскай гаспадаркі і харчавання, Мінскага абласнога выканаўчага камітэта, Белаграпрамбанка, а таксама Беларускага саюза жанчын.
Конкурс "Уладар вёскі" стартаваў у Глыбоцкім раёне 6 мая 2007 года. У 2008-м маладзёжная ініцыятыва была падтрымана на рэспубліканскім узроўні. Праект атрымаў пастаянную прапіску ва ўсіх рэгіёнах краіны. Ён рэалізуецца як рэспубліканскі сямейны сельскагаспадарчы праект, галоўная мэта якога - садзейнічанне замацаванню маладых сем'яў у вёсцы, умацаванне інстытута сям'і, папулярызацыя гістарычных, культурных каштоўнасцей, традыцый беларускай вёскі, далучэнне моладзі да здаровага ладу жыцця.
