Чэмпіянат Еўропы па фігурным катанні ў Мінску надасць імпульс развіццю гэтага віду спорту ў Беларусі. Такое меркаванне карэспандэнту БЕЛТА выказаў першы віцэ-прэзідэнт Міжнароднага саюза канькабежцаў (ISU) Аляксандр Лакернік.
"У Мінску я не першы раз і ведаю, што гэта прыгожы горад, поўны добразычлівых людзей. Праўда, у час чэмпіянату паглядзець яго добра не ўдалося. Упэўнены, што гэтыя спаборніцтвы нададуць імпульс развіццю фігурнага катання ў краіне. Лічу, што беларусам трэба павышаць узровень трэнерскага складу, выкарыстоўваць вопыт расійскіх і замежных калег", - сказаў Аляксандр Лакернік.
Ён адзначыў, што спартыўны форум быў праведзены на добрым узроўні.
Аляксандр Лакернік назваў выступленне расійскіх атлетаў здавальняючым. "Выступілі нядрэнна, медалёў у нас шмат. Але падстава для роздумаў ёсць, будзем разбірацца, што не атрымалася", - дадаў ён.
Чэмпіянат Еўропы па фігурным катанні ў Мінску стартаваў 23 студзеня і завяршыўся 27 студзеня маштабным гала-паказам. Удзел у кантынентальным форуме прынялі звыш 100 атлетаў з краін Старога Свету.