Патрабаванні, што прад'яўляюцца да грамадзян, якія маюць намер вылучацца кандыдатамі ў дэпутаты Палаты прадстаўнікоў:
грамадзянства Рэспублікі Беларусь;
дасягненне ўзросту 21 года;
пастаяннае пражыванне на тэрыторыі Рэспублікі Беларусь;
адсутнасць судзімасці.
Грамадзянін можа вылучацца кандыдатам у дэпутаты Палаты прадстаўнікоў толькі па адной выбарчай акрузе.
Права вылучэння кандыдатаў у дэпутаты Палаты прадстаўнікоў прыналежыць:
палітычным партыям,
працоўным калектывам,
грамадзянам шляхам збору подпісаў.
Вылучэнне кандыдатаў у дэпутаты ад палітычных партый ажыццяўляецца вышэйшымі органамі палітычных партый. Партыя мае права вылучыць па кожнай выбарчай акрузе толькі аднаго кандыдата ў дэпутаты Палаты прадстаўнікоў з ліку членаў гэтай палітычнай партыі.
Вылучэнне кандыдатаў у дэпутаты ад працоўных калектываў ажыццяўляецца на сходах (канферэнцыях) выбаршчыкаў у працоўных калектывах.
Вылучэнне кандыдатаў у дэпутаты выбаршчыкамі шляхам збору подпісаў ажыццяўляецца ініцыятыўнымі групамі грамадзян. Пры вылучэнні кандыдатам у дэпутаты Палаты прадстаўнікоў шляхам збору подпісаў ініцыятыву павінны падтрымаць не менш як 1000 выбаршчыкаў, якія пражываюць у выбарчай акрузе.
Асоба, вылучаная кандыдатам у дэпутаты Палаты прадстаўнікоў, прадстаўляе ў акруговую камісію дакументы, неабходные для яго рэгістрацыі кандыдатам не пазней чым за 40 дзён да выбараў.
Выбары дэпутатаў у Палату прадстаўнікоў Нацыянальнага сходу Рэспублікі Беларусь - 11 верасня 2016 года.
Крыніца: ЦВК Беларусі.