19 верасня, Мінск /Кар. БЕЛТА/. Арганізацыі тарфяной прамысловасці Міністэрства энергетыкі завяршаюць сезон здабычы торфу, паведамілі БЕЛТА ў прэс-службе Мінэнерга.
Па стане на 16 верасня бягучага года здабыта 2 568,4 тыс. т торфу, што складае 110,4 працэнта ад гадавога задання і 119 працэнтаў адносна аналагічнага перыяду мінулага года. Усе 23 прадпрыемствы галіны, што здабываюць торф, выканалі ўстаноўленае сезоннае заданне.
Аб'ём здабычы фрэзернага торфу ў 2018 годзе запланаваны з улікам поўнага забеспячэння сыравінай для выканання даведзеных вытворчых паказчыкаў па выпуску тарфяной прадукцыі ў бягучым годзе і стварэння неабходнага рэзерву торфу для работы ў першым паўгодзі 2019 года, адзначылі ў прэс-службе. У сувязі са спрыяльнымі ўмовамі надвор'я асобныя прадпрыемствы прадаўжаюць здабычу торфу.
Вытворчыя магутнасці арганізацый тарфяной прамысловасці Міністэрства энергетыкі даюць магчымасць штогод здабываць каля 2,5 млн т торфу і вырабляць да 1,4 млн т паліўных брыкетаў. Па ўзроўні здабычы Беларусь займае другое месца ў Еўропе пасля Фінляндыі, праінфармавалі ў Мінэнерга.
Для работнікаў прадпрыемстваў, занятых на здабычы торфу, дзейсным стымулам з'яўляецца ўдзел у рэспубліканскім спаборніцтве "Лепшы па прафесіі" сярод машыністаў уборачных машын, машыністаў, занятых на варушэнні і валкаванні, машыністаў фрэзерных барабанаў, машыністаў штабялюючых машын. Па выніках конкурсу вызначаюцца лепшыя па прафесіі спецыялісты і арганізацыі-пераможцы. Конкурс праводзіцца штогод з 2012 года. У бягучым годзе падвядзенне вынікаў пройдзе на базе ААТ "ТБЗ Браслаўскі" ў канцы кастрычніка.-0-
