16 студзеня, Хартум /Уладзімір Мацвееў - БЕЛТА/. Зборачная вытворчасць трактароў МТЗ можа з'явіцца ў Судане да канца 2017 года. Аб гэтым у Хартуме расказаў журналістам дырэктар кампаніі па продажы сельгастэхнікі і абсталявання, якая з'яўляецца даччынай арганізацыяй вядомай суданскай групы кампаній MIG (Mohamed Ikhwan Group), Мухамед Абдэльазім, перадае карэспандэнт БЕЛТА.
"MIG Agriculture з'яўляецца эксклюзіўным дыстрыб'ютарам на рынку Судана прадукцыі такіх беларускіх прадпрыемстваў, як МТЗ, МАЗ, "Белшына". У нас ёсць вопыт работы з МТЗ з 1994 года. Цяпер мы прадаём шэраг мадэлей трактароў і ўваходзім у тройку лепшых дыстрыб'ютараў у Судане", - расказаў Мухамед Абдэльазім.
Паводле яго слоў, беларускія трактары пацвердзілі сваю якасць і атрымалі шырокую вядомасць. "Наша доля на рынку пастаянна ўзрастае. І мы зацікаўлены ў бліжэйшыя дні падпісаць пагадненне з МТЗ аб стварэнні зборачнай вытворчасці. Мы таксама хочам прадставіць вялікія трактары (магутнасцю 200-250 к.с.), якія працуюць на вытворчасці цукру. Гэта тэхніка даказала сваю якасць і паказала сябе з добрага боку ў Паўднёвай Амерыцы. А ў Судане ёсць некалькі вялікіх цукровых вытворчасцей", - заявіў бізнесмен.
Зборачная вытворчасць трактароў можа з'явіцца ўжо да канца бягучага года, адзначыў Мухамед Абдэльазім. "Мы збіраемся падпісаць мемарандум аб намерах. А затым камісія з Беларусі прыедзе ў Судан абмеркаваць гэта пытанне і тое, наколькі вялікай будзе гэта вытворчасць. У нас ёсць зямля, будынак. Таму працэс не зойме шмат часу. Тэрытарыяльна пляцоўка размешчана за 15 км ад Хартума. Адсюль будзе лёгка арганізаваць пастаўкі ў іншыя часткі Судана", - расказаў ён. Бізнесмен упэўнены, што гэта дасць магчымасць павялічыць аб'ём паставак трактароў з Беларусі. Акрамя таго, будуць створаны новыя рабочыя месцы.
Мухамед Абдэльазім таксама расказаў аб намеры падпісаць агенцкае пагадненне і купіць для тэсціравання ўборачны камбайн прадпрыемства "Гомсельмаш". "Калі ўсё пойдзе паспяхова, то ў далейшым будзем закупляць гэту тэхніку. У Судане вельмі высокая патрэбнасць ва ўборачных камбайнах", - сказаў ён.
Ёсць вялікая цікавасць у Судане і да прадукцыі "Белшыны", супрацоўніцтва ў хімічнай індустрыі, у прыватнасці па закупцы калійных угнаенняў.
"З прадпрыемствам МАЗ мы нядаўна адгрузілі 10 грузавікоў для кампаніі Petrola, што працуе ў нафтавай сферы. Мы чакаем, што супрацоўніцтва будзе паспяхова прадаўжацца", - сказаў Мухамед Абдэльазім.
У працэсе рэалізацыі і планы па будаўніцтве сіласаў для патрэб сельскай гаспадаркі Судана. "Мы ведаем, што Беларусь мае вялікія поспехі ў гэтай індустрыі. Адпаведнае абсталяванне вырабляецца "Амкадорам", на прадпрыемстве ў Лідзе", - адзначыў бізнесмен.
"Беларускія тавары канкурэнтаздольныя. Наша ўзаемадзеянне з беларускімі кампаніямі вельмі добрае, празрыстае і функцыянальнае. Усё робіцца без затрымкі і праблем. Мы вельмі аптымістычна настроены, - заявіў Мухамед Абдэльазім. - У Судана вялікі патэнцыял у сельскай гаспадарцы. А ў Беларусі адны з лепшых кампаній у гэтай сферы, асабліва па вытворчасці сельгасабсталявання і тэхнікі, у аграрнай навуцы. Наведваючы Мінск год таму, я быў вельмі ўражаны развіццём адпаведных напрамкаў".
Бізнесмен упэўнены, што ёсць і шмат іншых напрамкаў для развіцця супрацоўніцтва, напрыклад дрэваапрацоўка, малочная прамысловасць, медыцына. "Апошняе асабліва важна, таму што мы трацім сотні мільёнаў долараў, людзі ездзяць у іншыя краіны для атрымання медыцынскіх паслуг. А ў Беларусі адпаведныя паслугі лепшай якасці і параўнальна танныя. Таму мы заклікаем краіны ў большай ступені сканцэнтравацца на гэтым пытанні", - сказаў ён.
16-17 студзеня Прэзідэнт Беларусі Аляксандр Лукашэнка наведае з афіцыйным візітам Судан. У гэты час у сталіцы гэтай краіны Хартуме пройдзе беларуска-суданскі дзелавы форум.-0-
