9 снежня, Мінск /Юлія Огнева - БЕЛТА/. Зацверджаны дададзены пералік пратэрмінаваных працэнтаў крэдытаатрымальнікаў адкрытага акцыянернага таварыства "Белаграпрамбанк". Адпаведная пастанова Савета Міністраў і Нацыянальнага банка ад 24 лістапада 2016 г. нумар 967/30 апублікавана сёння на Нацыянальным прававым інтэрнэт-партале, перадае карэспандэнт БЕЛТА.
Дакумент прыняты ў адпаведнасці з указам нумар 268 "Аб стварэнні і дзейнасці адкрытага акцыянернага таварыства "Агенцтва па кіраванні актывамі".
У пераліку - 386 прадпрыемстваў. Сума абавязацельстваў па пратэрмінаваных працэнтах адпавядае эквіваленту $110 млн.
Пастанова ўступіла ў сілу 25 лістапада 2016 года.
ААТ "Агенцтва па кіраванні актывамі" было створана ў ліпені 2016 года. Яму будзе перадавацца праблемная запазычанасць банкаў па крэдытах устойліва неплацежаздольных сельскагаспадарчых арганізацый. Агенцтва надзелена паўнамоцтвамі па прадастаўленні адтэрміноўкі (растэрміноўкі) пагашэння асноўнага доўгу па перададзеных яму крэдытах. Рэалізацыя адпаведнага механізма дасць магчымасць "расчысціць" балансы крэдытуючых банкаў і вызваліць крыніцы для крэдытавання плацежаздольных сельскагаспадарчых арганізацый.-0-
