29 сакавіка, Мінск /Аліна Грышкевіч - БЕЛТА/. Усе праграмы Сусветнага банка рэалізуюцца ў Беларусі вельмі якасна, заявіў старшы віцэ-прэзідэнт Сусветнага банка па аперацыйных пытаннях Кайл Пітэрс на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
Госць адзначыў, што, знаходзячыся ў Беларусі, змог убачыць, як "будуюцца праграмы, якія Сусветны банк рэалізуе". "Усе праграмы рэалізуюцца вельмі якасна", - падкрэсліў ён.
"Мой цяперашні візіт таксама звязаны з развіццём і зацвярджэннем новай краінавай праграмы для Беларусі на наступныя тры-чатыры гады", - паведаміў Кайл Пітэрс. Старшы віцэ-прэзідэнт Сусветнага банка дадаў, што цяпер на парадку дня дзевяць праграм агульнай сумай амаль $1 млрд. Яны датычацца інфраструктуры, водазабеспячэння, энергетыкі, транспартнай сферы, пачынаецца супрацоўніцтва ў галіне адукацыі.-0-