11 студзеня, Мінск /Кар. БЕЛТА/. Урад зацвердзіў парадак распрацоўкі тэхнічных рэгламентаў Беларусі. Гэта прадугледжана пастановай Савета Міністраў ад 10 студзеня 2018 года нумар 16, паведамілі БЕЛТА ў прэс-службе ўрада.
Дакументам зацверджаны парадак распрацоўкі, зацвярджэння, дзяржрэгістрацыі, праверкі, перагляду, змянення, адмены, прымянення, афіцыйнага распаўсюджвання (прадастаўлення) тэхрэгламентаў Беларусі, а таксама размяшчэння іх праектаў, паведамленняў аб іх распрацоўцы і завяршэнні разгляду ў інтэрнэце.
Згодна з дакументам, распрацоўка тэхрэгламентаў вядзецца Дзяржаўным камітэтам па стандартызацыі, іншымі рэспубліканскімі органамі дзяржкіравання, Нацыянальным банкам у межах прадастаўленых ім паўнамоцтваў пры ўмове, што адпаведны орган дзяржкіравання, Нацбанк вызначаны ў якасці адказнага выканаўцы (распрацоўшчыка).
Афіцыйнае распаўсюджванне (прадастаўленне) тэхнічных рэгламентаў ажыццяўляюць Дзяржстандарт, Нацыянальны цэнтр прававой інфармацыі і Нацыянальны інстытут па стандартызацыі.
Пастанова ўступае ў сілу пасля афіцыйнага апублікавання.-0-