5 снежня, Мінск /Кар. БЕЛТА/. Урад па выніках 2017 года чакае росту ВУП Беларусі на 2 працэнты, па выніках 2018-га - на 3,5 працэнта. Аб гэтым паведаміў прэм'ер-міністр Андрэй Кабякоў на пасяджэнні Савета Міністраў, дзе абмяркоўваюцца вынікі работы эканомікі за мінулы перыяд 2017 года, чаканыя вынікі за 2017-ы і ацэнка студзеня 2018 года, перадае карэспандэнт БЕЛТА.
Андрэй Кабякоў звярнуў увагу, што да завяршэння года засталося менш за месяц - каб кардынальна змяніць сітуацыю, часу мала, але паправіць рэзультаты кропкава там, дзе гэта неабходна, магчымасць ёсць.
Вынікі сацыяльна-эканамічнага развіцця за студзень-кастрычнік нядаўна разглядаліся на нарадзе ў кіраўніка дзяржавы. "Паводле даных статыстыкі, па асноўных паказчыках развіцця эканомікі ідзём у параметрах прагнозу і нават крыху вышэй. Мы чакаем, што тэмпы росту эканомікі па годзе будуць забяспечаны на ўзроўні 102 працэнты пры прагнозе 101,7 працэнта", - сказаў прэм'ер-міністр.
Нязначнае адставанне пакуль ёсць па двух паказчыках - рост рэальных наяўных грашовых даходаў насельніцтва і прыцягненне прамых замежных інвестыцый на чыстай аснове. Што датычыцца рэальных наяўных грашовых даходаў насельніцтва, то па годзе чакаецца выкананне паказчыка і забеспячэнне тэмпу росту не менш за 101,3 працэнта да 2016 года. За дзевяць месяцаў прыцягнута $905 млн прамых замежных інвестыцый на чыстай аснове пры заданні $1 млрд 30 млн. Паводле ацэнкі старшынь аблвыканкамаў, па выніках года лічба павінна быць вельмі блізкая да прагнознага значэння $1,4 млрд (плюс-мінус $20 млн). Разам з тым, Мінэканомікі інфармуе, што ёсць рызыка невыканання паказчыкаў Брэсцкім, Віцебскім аблвыканкамамі, Мінскім гарвыканкамам. Андрэй Кабякоў запатрабаваў далажыць, як складзецца сітуацыя па выніках года і якія меры прымаюцца для прыцягнення замежных інвестыцый у запланаваным аб'ёме.
Па даручэнні ўрада Мінэканомікі прапрацавала з усімі міністрамі і старшынямі аблвыканкамаў чаканыя вынікі развіцця галін і рэгіёнаў да канца 2017 года і на студзень 2018-га. З улікам гэтай ацэнкі Мінэканомікі ўнесла адпаведныя прапановы па мэтавых задачах на бліжэйшы перыяд.
Асобным блокам сёння на пасяджэнні будзе разглядацца сітуацыя ў будаўніцтве. Праблемных пытанняў у гэтай галіне пакуль шмат, канстатаваў кіраўнік урада.
Паводле інфармацыі дзяржаўных органаў, у студзені 2018 года тэмп росту ВУП знаходзіцца на ўзроўні 101,4 працэнта. Мінэканомікі мае магчымасці для выхаду на ўзровень 102,1 працэнта. "Ні тая, ні другая ацэнка не можа задаволіць урад, гэтага недастаткова для нармальнага старту. Дапускаю, што першыя ацэнкі асцярожныя, але звяртаю ўвагу, што ў пачатку бягучага года эканоміка прасядала - у студзені ВУП быў 99,5 працэнта да ўзроўню студзеня 2016-га. На наступны год у нас прагноз тэмпу росту ВУП - 103,5 працэнта. Таму навярстаць у далейшым адставанне ад прагнознага значэння ВУП будзе больш складана ў 2018 годзе, калі мы ў студзені са старту не спрацуем, як належыць", - звярнуў увагу Андрэй Кабякоў.
"Даручаю Мінэканомікі разам з міністрамі, губернатарамі яшчэ раз усё выверыць, паглядзець рэзервы і пры фарміраванні пастановы ўрада па задачах на 2018 год вызначыць адпаведныя напружаныя задачы ў разрэзе галін і органаў кіравання. Задача - у студзені павінны стартаваць з узроўню не меншага за гадавы прагноз", - дадаў прэм'ер-міністр.
Андрэй Кабякоў таксама адзначыў, што наперадзе навагоднія святы і сітуацыя на спажывецкім рынку павінна быць пад кантролем. "Прашу міністра антыманапольнага рэгулявання і гандлю забяспечыць гэты кантроль, звярнуць увагу на асартымент і цэны", - сказаў кіраўнік урада.-0-
