29 снежня, Мінск /Кар. БЕЛТА/. Пастановай урада нумар 1026 ад 28 снежня 2017 года зацверджаны план работы Савета Міністраў і Прэзідыума Савета Міністраў на першае паўгоддзе 2018 года, паведамілі БЕЛТА ў прэс-службе ўрада.
У прыватнасці, на пасяджэннях Савета Міністраў плануецца разгледзець вынікі сацыяльна-эканамічнага развіцця Беларусі за 2017 год, а таксама за студзень-сакавік 2018 года.
На пасяджэнні Прэзідыума Саўміна будуць вынесены пытанні аб канцэптуальных асновах прагнозу сацыяльна-эканамічнага развіцця Беларусі на 2018 год і на перыяд да 2020 года, напрамках бюджэтна-фінансавай і падатковай палітыкі на 2018 год і сярэднетэрміновай фінансавай праграмы на 2018-2020 гады.
Акрамя таго, плануецца абмеркаваць ход рэалізацыі дзяржаўнай праграмы інавацыйнага развіцця на 2016-2020 гады, Нацыянальнай праграмы падтрымкі і развіцця экспарту на 2016-2020 гады, дзяржаўнай праграмы "Энергазберажэнне" на 2016-2020 гады.
Размова таксама пойдзе аб канцэптуальных асновах прагнозу сацыяльна-эканамічнага развіцця Беларусі на 2019 год і на перыяд да 2021 года, напрамках бюджэтна-фінансавай і падатковай палітыкі на 2019 год і сярэднетэрміновай фінансавай праграмы на 2019-2021 гады.
Разам з тым удзельнікі пасяджэнняў Прэзідыума разгледзяць пытанні мадэрнізацыі нафтаперапрацоўчых заводаў, ААТ "Магілёўхімвалакно" і стратэгіі развіцця нафтахімічнага комплексу краіны да 2030 года.
Акрамя таго, плануецца разгледзець ход выканання даручэння кіраўніка дзяржавы па развіцці Барысаўскага раёна.
Сярод іншага запланавана выязное пасяджэнне Прэзідыума Саўміна, у час якога размова пойдзе аб павышэнні ўзроўню канкурэнтаздольнасці эканомікі Бабруйска і Бабруйскага раёна, у тым ліку за кошт развіцця малога і сярэдняга бізнесу, стварэння рабочых месц і ўключэння ў гаспадарчы абарот дзяржаўнай маёмасці, якая не выкарыстоўваецца або неэфектыўна выкарыстоўваецца.
Асобна на адным з пасяджэнняў будзе разгледжаны ход рэалізацыі ўказа нумар 235 ад 8 чэрвеня 2015 года "Аб сацыяльна-эканамічным развіцці паўднёва-ўсходняга рэгіёна Магілёўскай вобласці" і праграмы сацыяльна-эканамічнага развіцця паўднёва-ўсходняга рэгіёна Магілёўскай вобласці на перыяд да 2020 года.
Усяго ў першым паўгоддзі 2018 года на пасяджэннях Саўміна і Прэзідыума Саўміна плануецца разгледзець 23 пытанні.-0-