23 красавіка, Мінск /Кар. БЕЛТА/. У Беларусі зменяцца падыходы да фарміравання нацэнак у сталовых ВНУ і школ, паведаміў міністр антыманапольнага рэгулявання і гандлю Уладзімір Калтовіч у эфіры тэлеканала "Беларусь 1", перадае БЕЛТА.
"Мы ўнеслі змяненні ва ўказ нумар 72, цяпер яны знаходзяцца на экспертызе. Сутнасць гэтых змяненняў у тым, што ўсе функцыі па цэнаўтварэнні будуць перададзены ў МАРГ. Для таго, каб цяпер выключыць двайное тлумачэнне пры фарміраванні цэн, мы распрацавалі метадычныя рэкамендацыі. Сутнасць у тым, што гандлёвая надбаўка ў памеры 20 працэнтаў прымяняецца не да цаны апошняга пастаўшчыка, а да цаны вытворцы. Гэта яшчэ і маленькі ўклад у скарбонку вырашэння праблемы пасрэднікаў. Цяпер нацэнкі ў грамадскім харчаванні сапраўды адрозніваюцца. Упэўнены, што пасля перадачы функцый МАРГ мы зможам знайсці нейкую сярэднеўзважаную велічыню, якая адпавядала б сёння эканамічным інтарэсам усіх рэгіёнаў", - сказаў Уладзімір Калтовіч.
Акрамя таго, было падпісана пагадненне аб узаемадзеянні і інфармацыйным абмене паміж Міністэрствам антыманапольнага рэгулявання і гандлю і Асацыяцыяй рознічных сетак. Сутнасць пагаднення заключаецца ў павышэнні эфектыўнасці і аператыўнасці атрымання інфармацыі аб цэнавай сітуацыі на спажывецкім рынку. "Калі гаварыць аб рабоце з нядобрасумленнымі вытворцамі або гандлем, думаю, нас выратуе публічнасць. Мы плануем на сайце ў бліжэйшы час стварыць такі рэсурс, у якім будзе відаць, хто і як павышае цэны. Думаю, гэта будзе ўплываць на рэйтынгі гэтых прадпрыемстваў і дасць магчымасць спажыўцу арыентавацца ў цэнах на прадукцыю", - адзначыў міністр.-0-
