13 студзеня, Мінск /Кар. БЕЛТА/. Сусветны банк палепшыў прагноз па беларускай эканоміцы, адпаведны даклад "Глабальныя эканамічныя перспектывы" (Global Economic Prospects) апублікаваны на гэтым тыдні, паведамляе БЕЛТА.
У прыватнасці, аналітыкі банка палепшылі сваю ацэнку будучага беларускай эканомікі. Яны лічаць, што ў 2017 годзе яна спадзе на 0,5 працэнта (у чэрвені 2016 года называлася лічба зніжэння ў памеры 1 працэнта), у 2018-м вырасце на 1,3 працэнта (прагназавалася прыбаўка ў памеры 0,3 працэнта), а ў 2019 годзе павялічыцца яшчэ на 1,4 працэнта.
У дакладзе гаворыцца, агульны рост у рэгіёне "Еўропа і Цэнтральная Азія" (куды не ўваходзіць зона еўра і Вялікабрытанія) паскорыцца ў 2017-2019 гадах у сярэднім да 2,7 працэнта ў год. Драйверам будзе аднаўленне эканомік краін-экспарцёраў сыравіны і паляпшэнне даверу, што звязана з працяглым умераным ростам цэн на сыравіну і аслабленнем геапалітычнай напружанасці.
Як адзначалі раней эксперты Сусветнага банка, аднаўленне эканомікі Беларусі чакаецца дзякуючы паляпшэнню знешняга асяроддзя і першым вынікам па павышэнні мер нацыянальнай канкурэнтаздольнасці. Пры гэтым знешнія рызыкі, як і раней, будуць абумоўлены павелічэннем дэфіцыту рахунку бягучых аперацый і значнымі выплатамі па пагашэнні і абслугоўванні дзяржаўнага знешняга доўгу ў замежнай валюце.
Меры ў галіне эканамічных пераўтварэнняў павінны быць па-ранейшаму сканцэнтраваны на павышэнні канкурэнтаздольнасці і прадукцыйнасці прадпрыемстваў, што з'яўляецца ключавой перадумовай для ўстойлівага росту эканомікі. Для стымулявання стварэння новых прыватных прадпрыемстваў неабходна далейшае паляпшэнне ўмоў вядзення бізнесу, хоць апошнія гады ў гэтай галіне быў дасягнуты пэўны прагрэс - Беларусь заняла 37-е месца сярод 190 краін у рэйтынгу "Вядзенне бізнесу".-0-
