29 ліпеня, Мінск /Юлія Огнева - БЕЛТА/. Работа па стварэнні Міністэрства антыманапольнага рэгулявання і гандлю вядзецца ў адпаведнасці з зацверджаным графікам, паведаміў сёння журналістам міністр гандлю Уладзімір Калтовіч, перадае карэспандэнт БЕЛТА.
"У нас тры месяцы тэрмін, адведзены ўказам, для вырашэння тэхнічных пытанняў, прывядзення некаторых нарматыўна-прававых актаў у адпаведнасць. З 8 верасня Міністэрства антыманапольнага рэгулявання і гандлю павінна функцыянаваць. Створана рабочая група, работа вядзецца ва ўстаноўленым графікам парадку і рэжыме", - адзначыў Уладзімір Калтовіч.
Міністэрства антыманапольнага рэгулявання і гандлю ствараецца на базе Міністэрства гандлю Беларусі. Адпаведны ўказ нумар 188 падпісаны 3 чэрвеня. У склад ведамства перадаюцца Дэпартамент цэнавай палітыкі Міністэрства эканомікі, а таксама ўпраўленні антыманапольнай і цэнавай палітыкі аблвыканкамаў і Мінскага гарвыканкама.
На новы антыманапольны орган ускладзены функцыі па процідзеянні манапалістычнай дзейнасці і развіцці канкурэнцыі на таварных рынках рэспублікі, у тым ліку функцыі органа рэгулявання дзейнасці суб'ектаў натуральных манаполій, рэгуляванні цэн і тарыфаў, кантролю і рэгулявання спажывецкага рынку, у галіне дзяржзакупак, рэкламнай дзейнасці і абароны правоў спажыўцоў. Ключавой мэтай новага міністэрства з'яўляецца вырашэнне праблемы абароны ўнутранага рынку рэспублікі шляхам стварэння роўных канкурэнтных умоў для ўсіх яго ўдзельнікаў.-0-
