10 лістапада, Мінск /Міхаіл Маціеўскі - БЕЛТА/. Стратныя сельгаспрадпрыемствы ў Беларусі плануецца паставіць на ногі за 2018-2019 гады. Аб гэтым паведаміў сёння журналістам намеснік прэм'ер-міністра Міхаіл Русы па выніках даклада Прэзідэнту Аляксандру Лукашэнку, перадае карэспандэнт БЕЛТА.
Кіраўніку дзяржавы былі прадстаўлены прапануемыя змяненні ва ўказ нумар 253 "Аб мерах па фінансавым аздараўленні сельскагаспадарчых арганізацый". Дакумент прадугледжвае дадатковыя падыходы да работы са стратнымі прадпрыемствамі.
"Задача, каб за 2018-2019 гады, выкарыстоўваючы ўсе гэтыя механізмы, мы сталі цвёрда на ногі, у крайнім выпадку, каб тыя прадпрыемствы, якія сёння рэгенерыруюць страту, маглі самі сябе ўтрымліваць", - сказаў Міхаіл Русы.
У прыватнасці, праектам новага ўказа прадугледжваецца зніжэнне арэнднай платы за прадпрыемства як маёмасны комплекс з 5 працэнтаў да 2 працэнтаў ад балансавага кошту маёмасці. Гэта мера дасць магчымасць прадпрыемствам скараціць свае расходы.
Таксама дэталізуецца працэдура правядзення канвертацыі патрабаванняў крэдытораў у акцыі дадатковага выпуску з аплатай гэтых акцый шляхам заліку патрабаванняў да сельскагаспадарчай арганізацыі. Міхаіл Русы адзначыў, што гэта дасць магчымасць знізіць даўгавую нагрузку, а таксама прыцягнуць інвестыцыі ў развіццё такіх арганізацый. "Ёсць прадпрыемства. Мы правялі з ім эканамічную работу, зрабілі рэструктурызацыю, але пацягнуць ад выручкі груз крэдыторскай нагрузкі яно не можа. Крэдыторы згодны даўгі канверсаваць у акцыі новага прадпрыемства. Усе правілы, якія неабходны для прыняцця гэтага рашэння, мы прапісалі ва ўказе", - растлумачыў ён.
У новым дакуменце прапануецца прадастаўляць інвестарам магчымасць выбіраць метад вызначэння ацэнкі кошту прадпрыемства як па чыстых актывах, так і па рыначнай ацэнцы. Пакупнікам або атрымальнікам капітальных будынкаў будуць прадастаўляцца зямельныя ўчасткі, дзе размешчаны гэтыя будынкі, без правядзення аўкцыёнаў на рэчавых правах.
Кіраўнік дзяржавы даручыў прадугледзець ва ўказе асаблівы статус для сельскагаспадарчых арганізацый, якія знаходзяцца ў працэдуры банкруцтва або трапляюць пад яе. Прапануецца распаўсюдзіць на такія прадпрыемствы інструменты антыкрызіснага кіравання: дадатковы выпуск акцый паміж акцыянерамі і трэцімі асобамі, канвертацыю патрабаванняў крэдытораў у акцыі, унясенне ўкладаў удзельнікамі і трэцімі асобамі ў статутны фонд арганізацыі, замяшчэнне актываў прадпрыемства. "Самае галоўнае, што мэта адзіная - калектыў застаецца, мэтавае выкарыстанне гэтага прадпрыемства застаецца. Прадпрыемства атрымае новага гаспадара, і будзе прынята рашэнне, як яно будзе працаваць далей: самастойна, перадавацца ў арэнду або кіраванне", - сказаў Міхаіл Русы.
Праект дакумента прадугледжвае і шэраг іншых мер, рэалізацыя якіх дасць магчымасць больш эфектыўна паднімаць стратныя сельскагаспадарчыя арганізацыі, колькасць якіх у краіне паступова зніжаецца.
Аляксандр Лукашэнка даручыў дапрацаваць у праекце ўказа асобныя моманты і звярнуў асаблівую ўвагу на ўдзел мясцовых органаў улады ў гэтай рабоце, паколькі яны нясуць адказнасць за кожнае прадпрыемства і яго калектыў. Менавіта ўлада на месцах, на думку Прэзідэнта, у першую чаргу павінна вырашаць, якім чынам арганізацыі будуць праходзіць працэдуру аздараўлення. Такім чынам будзе гарантавана захаванне вытворчасці і калектываў.-0-
